Artikkelstart
Lulesamisk er eitt av dei tre offisielle samiske språka i Noreg, saman med sørsamisk og nordsamisk. Lulesamisk er førstespråket til 1500 personar i Sverige og 500 i Noreg, av ei etnisk gruppe på til saman 7000–8000 menneske. På UNESCOs liste over trua språk er lulesamisk klassifisert som alvorleg trua.
Faktaboks
- Språkkoder
- smj (SMJ)
- ISO-639:3
- smj
Det tradisjonelle lulesamiske språkområdet i Noreg strekkjer seg frå Ballangen i nord til Saltfjellet i sør og omfattar mellom anna Tysfjord, Hamarøy, Steigen, Sørfold og delar av Fauske kommune i Nordland fylke. På svensk side blir lulesamisk snakka langs Lule älvdal i Jokkmokk kommune og del av Boden og Gällivare kommunar i Norrbottens län og frå Piteälven i sør til Kaitumälven i nord i Gällivara kommune.
Lulesamisk er jamstilt med norsk som offisielt språk i Hamarøy kommune, som er med i det norske forvaltingsområdet for samisk språk. Det har status som offisielt minoritetsspråk i kommunane Gällivare og Jokkmokk, som er med i det svenske förvaltningsområdet för samiska språket.
Julevsábme tyder ‘lulesame’ og ‘lulesamisk språk’. Språket kan òg kallast julevsámegiella. Sábme (med stor forbokstav) tyder ‘Sameland’, medan sábme (med liten forbokstav) og sábmelasj tyder ‘same’. Lulesamisk blir tala i to land, Vuodna ‘Noreg’ (bokstavleg ‘Fjord’) og Svierigi ‘Sverige’. Kommunane i det lulesamiske busetnadsområdet har desse lulesamiske namna: Divtasvuodna ‘Tysfjord’, Fuolldá ‘Sørfold’, Fuosko ‘Fauske’, Hábmer ‘Hamarøy’ og Stájggo ‘Steigen’ i Noreg og Jåhkåmåhkke ‘Jokkmokk’ og Jiellevárre eller Váhtjer ‘Gällivare’ i Sverige.
Kommentarer
Kommentaren din publiseres her. Fagansvarlig eller redaktør svarer når de kan.
Du må være logget inn for å kommentere.