Somali, høyrer til den kusjittiske greina av den afroasiatiske språkfamilien.
Somali er førstespråket (morsmålet) til om lag 22 millionar menneske og andrespråket til noko over 100 000 menneske. Dei fleste bur i desse fire landa på Afrikas Horn), det vil seie det nordlege Aust-Afrika:
Land | Førstespråkstalarar |
---|---|
Somalia | 11,2 millionar (2019) |
Kenya | 2,2 millionar (2019) |
Etiopia | 6,7 millionar (2018) |
Djibouti | 0,6 millionar (2019) |
Det finst store utvandra grupper i over tjue land, mellom anna 43 600 i Noreg (2021), der somaliarane er blant dei største ikkje-vestlege minoritetsgruppene.
To femdelar av dei somalitalande er bønder som bur i det sørlege og nordvestlege Somalia, der det er nok nedbør til å drive jordbruk. Dei resterande tre femdelane er nomadiske gjetarar.
Somali er offisielt språk i Somalia, ved sida av arabisk. Standard-somali blir nytta som skriftspråk over heile det somalitalande området på Afrikas Horn, og det blir brukt i undervisning, administrasjon og massemedia.
På somali heiter språket Af-Soomaali [æ̀f sɔ̀ːmɑːlɪ̀] eller Afka-Soomaaliga. Ordet af — afka i bunden (bestemt) form — tyder 'munn' og 'språk'.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.