Percy Grainger

Grainger vaks opp i Melbourne. Frå han var ti år gamal var mor hans eineforsyrgjar. Han synte tidleg musikalsk talent, og i 1895 flytta dei til Frankfurt for å la han byrja på Dr. Hoch's Konservatorium. Etter dette busette han seg i London i 1901, der han etablerte seg som pianist og komponist.

I 1917 flytta Grainger til USA, og busette seg i White Plains i delstaten New York. Planar om å flytta attende til Australia på 1940- og 1950-talet blei aldri gjennomført. I 1928 gifta han seg med den svenske kunstnaren Ella Ström i Hollywood Bowl, framfor eit publikum på om lag 20000 menneske. På 1930-talet etablerte han Grainger-museet i Melbourne. Etter Den andre verdskrigen komponerte han lite, og hadde dårleg helse.

Dei kontroversielle sidene ved Grainger har vore heftig debattert. Grainger var opent rasist og antisemitt, men fatta samstundes tidleg interesse for kinesisk musikk og jazz, og var av dei fyrste som samla inn musikken til maori-folket og polynesiarane. Ein fascinasjon for BDSM dokumenterte han sjølv i Grainger-museet. Han stod mora svært nær, og grunnlause rykte om incest mellom dei bidrog til at ho tok sjølvmord i 1922.

Grainger hadde ein musikalsk produksjon som strekkjer seg frå folkemusikkinsamling til tidleg elektronisk musikk. Han er mest kjend for klaverstykket «Country Gardens» og liknande verk inspirert av britisk folkemusikk, og ryet hans som komponist av små, populære klaververk har nok bidrege til at dei radikalt nyvinnande sidene ved produksjonen hans har fått lite merksemd.

Verka hans har til felles at han forkasta «dei store formene» som symfonien og sonatesatsforma til fordel for miniatyrar, som likevel får eit særpreg gjennom ei uvanleg merksemd for detaljar og ein hang til uvanlege løysingar; til dømes eksperimenterte Grainger tidleg med effektar som ujamne taktartar. I ensembleverk heldt han ei demokratisk fordeling av materiale mellom instrumenta som eit ideal.

Grainger var ein livslang ven av Skandinavia. Allereie som gut i Australia hadde han blitt fascinert av Edda-diktinga, og lærte seg dansk for å kunne eit språk som låg nær norrønt. I 1905 blei han kjent med Edvard Grieg (1843–1907), som mot slutten av livet rekna Grainger for å vera den finaste tolkaren av klaverkonserten hans. Sidan blei han ven med David Monrad Johansen og Sparre Olsen , og brukte namnet sitt til å prøva å hjelpa karrierane deira. Sparre Olsen gav på si side monografien Percy Grainger i 1963. I 1954 fekk Grainger St. Olavsmedaljen av kong Olav 5.

• musikk i Australia
• musikk i USA