Foreldre: Sosialsekretær Gustav Olsen (1866–1918) og Amalie Caspersen (1870–1946).
Gift 1) 1932 med pianist Edith Davidsen (1.6.1901–30.4.1969), datter av agent Conrad Davidsen (1871–1937) og Sally Mathiesen (1874–1937); 2) 12.5.1970 med Astrid Almestrand f. Huuse (29.8.1912–5.4.1997), datter av handelsgartner Anders J. Huuse (1878–1952) og Kristiane Mengshoel (1885–1979).
Bilete frå Norsk biografisk leksikon
Sparre Olsen var ein norsk komponist og fiolinist. Musikken til Olsen blir kjenneteikna av vakker lyrisk melodikk påverka av norsk folkemusikk. Harmonikken fører vidare linja etter Edvard Grieg.
Sparre Olsen hadde den store styrken sin i mindre, framfor alt vokale komposisjonar, og mange har fått stor utbreiing.
Sparre Olsen var elev hjå Herman van der Vegt frå 1922. Fram til 1926 studerte han teori med Ole Hjellemo og Bjarne Brustad. I fire år, 1926–1930, studerte han med Fartein Valen. Deretter oppheldt han seg eit par år i Berlin der han studerte med Max Butting ved Akademische Hochschule für Musik. Han følgde samtidig undervisninga hjå Arnold Schönberg og Paul Hindemith.
Olsen var orkesterfiolinist i Oslo i 1923–1933 og i Bergen i 1935–1936. I Bergen var han teorilærar ved Musikkakademiet i 1935–1940, og musikkmeldar i Bergens Tidende i 1935–1940. I åra 1950–1958 var Olsen medlem av Kringkastingsrådet. Han vart utnemnd til Ridder av 1. klasse av St. Olavs Orden i 1968.
Produksjonen til Olsen er omfangsrik og dekkjer dei aller fleste områda av musikken. Blant orkesterverka finn ein tre symfoniske fantasiar, Nidarosdomen, Serenade for fløyte og strykarar og Concertino for horn og strykarar. For kor og orkester inngår Draumkvedet, Ver sanctum og De profundis – sursum corda. Scenemusikken hans omfattar to verk – Anne på Torp til tekst av Tore Ørjasæter og Nederlaget til Nordahl Griegs tekst. Av kammermusikkverk kan ein nemne ein blåsekvintett (op. 35, 1946) og ein strykekvartett (op. 55, 1977). Fleire suitar for klaver – to med tittelen Frå Telemark og Leitom-suite – blir rekna som viktige blant Olsen sine verk. I tillegg kjem ei rekkje solosongar med klaver, i tillegg til tallause korsongar.
Olsen gav ut to biografiske skrifter, Percy Grainger (1963) og Tor Jonsson-minne (1968).
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.