Kristiansand ligg på Agder-kysten og er den sjette største byen i Noreg. Tettstaden Kristiansand har cirka 65 000 innbyggjarar. Kristiansand bymål er eit vestleg kystmål på Agder (eit sørvestleg e-mål). Dette bymålet har utvikla seg nokså langt bort frå det gammalnorske språket og blir difor karakterisert som eit moderne talemål. Særleg kjem dei enkle særdraga fram i bøying av ord og orddanning (formverk).
Berre nokre få kilometer utanfor sentrum skil talemålet seg mykje frå det me finn i byen. Sterkare enn landområda kring byen har nok målet i Kristiansand blitt påverka av riksmålet (bokmål) som mange av dei rike i byen hadde som norm.
Frå måla lenger aust skil kristiansandsmålet seg ved at dette bymålet har høgtone i tonem 1-ord og den karakteristiske endinga -ane i bestemt form fleirtal i substantiv av alle kjønn. Kystmåla aust for Kristiansand har substantivendinga -ene i bestemt fleirtal.
Bymålet i Kristiansand har endinga -r i fleirtal av substantiva og i presens av svake verb. Måla vest for byen har bortfall av endinga -r i dei nemnde kategoriane. Kjem ein så langt vest som til Audnedal/Lindesnes møter ein e/a-målet, og endå lenger vest er det reint a-mål, medan kristiansandsmålet er e-mål. Sjå meir utførleg her nedanfor om dei nemnde språklege særtrekka i Kristansand bymål.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.