Faktaboks

Svein Tindberg

Svein Randor Tindberg

Fødd
25. juni 1953, Oslo
Verke
Skuespiller
Familie

Foreldre: Scenograf Snorre Tindberg (1923–2008) og telefonekspeditør Inger Mogstad (1924–93).

Gift 1982 med familieterapeut Jannicke Walther (26.5.1959–), datter av Art Director Finn Walther (1931–86) og sykepleier Hilda Alstad (1931–).

Svein Tindberg i forestillinga Gudspartikkelen på Det Norske Teatret (2021)
/Det Norske Teatret.
Svein Tindberg

Svein Tindberg (til høgre) saman med Henrik Rafaelsen i Det Norske Teatret si oppsetjing av Brotsverk og straff (2006).

Av /KF-arkiv ※.

Svein Tindberg er ein norsk skodespelar. Frå 1990-åra har han hatt stor suksess med å framføre og formidle bibeltekstar på scenen, og med framsyninga Abrahams barn i 2011–2015 inkluderer det òg Koranen.

Bakgrunn

Svein Tindberg er fødd i Oslo. Han tok examen artium ved Nissen Gymnas i 1972, var elev ved Det Norske Teatret i 1972–1974 og fullførte Statens Teaterhøgskole i 1976. Frå same året har han vore tilsett ved Det Norske Teatret, med nokre avbrot. I 1980–1981 var han i Fjernsynsteatret, i 1987–1989 gjesta han Trøndelag Teater, i 1996–1999 Nationaltheatret og i 2001–2002 Riksteatern i Sverige.

Tindberg bestemte seg tidleg for å verte skodespelar. Faren var scenograf ved Det Norske Teatret, og det hadde mykje å seie for yrkesvalet hans.

Svein Tindberg er sonen til Snorre Tindberg og broren til Ivar Tindberg.

Skodespelarkarriere

Roller

Tindberg har spela mange klassikarroller, mellom anna Prins Paris i Ludvig Holbergs Ulysses von Itachia (Det Norske Teatret 1983), Edgar og seinare Lear i William Shakespeares Kong Lear (Det Norske Teatret 1983 og Trøndelag Teater 2007), Clitandre i Molières Lærde damer (Det Norske Teatret 1984), Romeo i Shakespeares Romeo og Julie (Det Norske Teatret 1985), tittelrolla i Edmond Rostands Cyrano de Bergerac (Det Norske Teatret 1993) og både Horatio og tittelrolla i Hamlet (Det Norske Teatret 1998 og Nationaltheatret 1998), Lord Goering i Oscar Wildes Den perfekte ektemann (Nationaltheatret 1996) og Otte i Olav Duuns Juvikfolke (Det Norske Teatret 2004).

Av Henrik Ibsen har han spela Osvald i Gengangere (Trøndelag Teater 1987), Gregers Werle i Vildanden (Nationaltheatret 1996), Knappestøyparen i Peer Gynt (Gålå 2014–2016 og Det Norske Teatret 2018) og tittelrolla i Brand (Det Norske Teatret 2015).

I moderne drama har han utmerkt seg i roller som den Elvis-fikserte hovudpersonen i Klaus Hagerups Heartbreak Hotel (Trøndelag Teater 1988), Kong Kristian i Edvard Hoems Sankt Olavs skrin (Det Norske Teatret 1990), Harald i Lars Noréns Tida er vår heim (Det Norske Teatret 1994) og Olof i Taus musikk av same forfattaren (Det Norske Teatret 2004) og Martini i Frode Gryttens Bikubesong (Det Norske Teatret 2003).

Tematisering av religiøse spørsmål

Svein Tindberg
Svein Tindberg i soloforestillinga Evangeliet etter Markus på Riksteateret (1995)
Av /Nasjonalbiblioteket.
Lisens: CC BY NC ND 4.0

I det kunstnariske arbeidet sitt har Tindberg tematisert religiøse spørsmål og gudstru. Rolla som presten Johannes i Kaj Munks Ordet førte han inn i dette interessefeltet.

Størst suksess har han hatt med einmannsframsyningane Evangeliet etter Markus (1995), Apostlenes gjerninger (2000) og Abrahams barn (2011/2012) på Det Norske Teatret, der dei tre verdsreligionane jødedom, kristendom og islam står sentralt. Den siste framsyninga har han skrive sjølv, og framsyningane er sett opp saman med regissør Kjetil Bang-Hansen. Monologframsyningane syner tru på dei religiøse tekstane si eiga formidlingskraft, og slik har Tindberg medverka til å fornye forteljartradisjonen kring denne typen tekstar. I 2021 kom den fjerde i rekkja, Gudspartikkelen.

I 2016 var han med i framsyninga Etterlyst: Jesus av Bjørn Eidsvåg på Det Norske Teatret.

Tindberg har òg gitt ut bøkene Juleevangeliet (2011), illustrert av Håkon Bleken, og Bibelfortellinger for barn (2017). I 2020 debuterte han som barnebokforfattar med Fangene i Adnafjell (2020), som var første boka om Charlie Drømmevandrer. I 2021 kom andre bind i serien, Sølvdronningens hevn.

Friluftsoppsetjingar og innspelingar

Tindberg har gjort fleire friluftsoppsetjingar, mellom anna har han regissert Mostraspelet, der han òg har spela Olav Haraldsson (1998–1999, 2005).

Musikkteater

Til Tindbergs roller i musikkteater høyrer Theodorakis-kabareten Snart gryr ein morgon (Det Norske Teatret 1982), Action i West Side Story (Det Norske Teatret 1982), Johannes i musikalversjonen av An-Magritt (Trøndelag Teater 1988), den vettskremde kjærasten Oscar i Sweet Charity (Thalia Teater 1989), Martini i Frode Gryttens Bikubesong (Det Norske Teatret 2003) og konferansieren i Cabaret (Trøndelag Teater 2008).

Lydbøker, film og TV

Tindberg har medverka i fleire filminnspelingar og plateutgivingar med resitasjon og opplesing.

Som filmskodespelar har han vore med i filmar som Erik Solbakkens Rallarblod (1979, basert på ein roman av Kristofer Uppdal) og Liv Ullmanns Kristin Lavransdatter (1995, etter Sigrid Undset). Han har hatt TV-roller mellom anna i Peer Gynt (1993), Fire høgtidar (2000), Kodenavn Hunter og Kodenavn Hunter 2 (2007 og 2008).

Prisar

Tindberg har fått fleire prisar for det kunstnariske arbeidet sitt, mellom anna Teaterkritikarprisen, Norske Teaterlederes pris og Telenor Bedrifts kulturpris i 1995, Bibelprisen i 1996, Oslo bys kunstnerpris i 1997, Brobyggerprisen i 2001, Petter Dass-prisen i 2011 og Heddaprisen i 2012 og 2018.

Les meir i Store norske leksikon

Eksterne lenker

Litteratur

  • Leif Mæhle (red.): Det Norske Teatret 75 år. Oslo 1988
  • Nils J. Ringdal: Nationaltheatrets historie 1899–1999. Oslo 2000

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg