Store norske leksikon
Artikkelstart
Anniken Hauglie er ein norsk politikar frå Høgre som tidlegare har vore byråd for kunnskap og utdanning i Oslo. Ho var òg arbeids- og sosialminister i regjeringa Solberg frå desember 2015 til januar 2020.
Anniken Hauglie
Faktaboks
Anniken Hauglie
- Født
- 10. september 1972, Oslo
Anniken Hauglie etter utnevningen til arbeids- og sosialminister i ekstraordinært statsråd på Slottet onsdag 16. desember 2015.
Bakgrunn
Anniken Hauglie er fødd i Oslo og voks opp i Ski (no Nordre Follo) i Akershus (no Viken). Ho var elev ved Kontra videregående skole i 1989–1991, og er utdanna cand.polit. med hovudfag i sosiologi frå Universitetet i Oslo i 2000. Ho skreiv hovudfagsoppgåve med tittelen «I skyggen av den kalde krigen», der ho samanlikna krigane i Bosnia og Algerie. Hauglie har òg mellomfag i statsvitskap og grunnfag i livssyn og etikk, og ho studerte prosjektleiing ved BI i 2006. Ho er gift med Høgre-politikar Lars Jacob Hiim.
Politisk karriere
Hauglie har arbeidd som politisk rådgivar for Akershus Høgre, var sosialpolitisk rådgivar for stortingsgruppa til Høgre i 2001–2003 og politisk rådgivar for sosialminister Ingjerd Schou i Bondevik 2-regjeringa i 2003–2005. I 2005–2006 var ho rådgivar i Forbrukarrådet, og ho var kommunalpolitisk rådgivar for stortingsgruppa til Høgre fram til 2010.
Byråd i Oslo
Frå 2010 til 2015 var Anniken Hauglie byråd i Oslo. 2010–2013 var ho byråd for sosiale tenester og 2013–2015 byråd for kunnskap og utdanning.
Statsråd
16. desember 2015 vart Anniken Hauglie utnemnde til arbeids- og sosialminister i regjeringa Solberg, som etterfølgjer for Robert Eriksson frå Framstegspartiet. Ho sat i denne statsrådsposten fram til endringane som følgde av at Framstegspartiet gjekk ut av regjeringa i januar 2020.
NAV-skandalen
Som statsråd var Hauglie ansvarlege for gjennomføringa av pensjonsreforma, og ho hadde òg ansvaret for NAV i perioden då det i 2019 vart kjent at ei rekkje brukarar av NAV feilaktig hadde vorte idømt straff, fleire av dei fengselsstraff, for misbruk av ulike ytingar. Skandalen rundt den feilaktige forståinga av EØS-regelverket førte til stort politisk press på Hauglie frå opposisjonen på Stortinget, og det var varsla mistillitsforslag mot henne då ho gjekk ut av regjeringa.
Andre verv
Hauglie var medlem av DSK/Minerva i 1990-åra, og i 2012–2013 var ho medlem av programkomiteen i Høgre. Frå 2020 er Hauglie administrerande direktør i Norsk olje og gass.
Kommentarer
Kommentaren din publiseres her. Fagansvarlig eller redaktør svarer når de kan.
Du må være logget inn for å kommentere.