Gjermund Larsen, norsk folkemusikar og komponist frå Verdal. Han har utdanninga si frå Spelemannsskulen ved Ole Bull Akademiet på Voss og frå Norges Musikkhøgskole i Oslo, der han som den aller fyrste folkemusikar på vanleg fele tok diplomeksamen i 2008. Larsen kjem frå ein folkemusikkfamilie der faren Geir Egil Larsen er ein kjend utøvar og pedagog. Saman med broren Einar Olav Larsen har Gjermund Larsen utvikla eit unikt samspel på vanleg fele. Dei forvaltar ein rik spelemannstradisjon frå Trøndelag med Hilmar Alexandersen som det store førebiletet.

I yngre år deltok Larsen mykje på kappleik og blei tidenes yngste Landskappleikvinnar i 2002 på Røros, han vann òg Landskappleiken i 2005 (kongepokal).

Larsen har vore med i gruppa Majorstuen frå starten i 2000. Dei fekk Spellemannprisen i 2003 for debutplata Majorstuen. Larsen var saman med broren Einar Olav Larsen med å starte den finsknorske gruppa Frigg som har hatt stor suksess i inn- og utland.

Gjermund Larsen Trio blei danna i 2006, og same året debuterte Larsen som komponist i bestillingsverket Brytningstid på Telemarkfestivalen. Store delar av dette verket låg til grunn for CD-en Ankomst som fekk Spellemannprisen i folkemusikklassa i 2008. Det er med denne trioen, med Andreas Utnem på orgel og Sondre Meisfjord på bass, at Larsen fyrst og fremst har eksponert seg og sin musikk i seinare tid.

Som komponist har Larsen mellom anna utmerka seg med bestillingsverket Osa-suite til Osafestivalen på Voss i 2010, dette  var skrive for Trondheimssolistene i samspel med brørne Larsen. Larsen har elles samarbeidd og turnert med ei rad musikarar: Odd Nordstoga, Sissel Kyrkjebø, Maj Britt Andersen, Berit Opheim, Helge Lien, Reidar Larsen, Eldbjørg og Ragnhild Hemsing, Christian Wallumrød ensemble, Kringkastingsorkesteret.

Larsen har deltatt på ei rad med plater, nokre av desse er: Frå setergolv til dansargolv (2000, Tjukke slekta), Frigg (2001), Søttenpassingen (2004 med broren Einar Olav), Oasis (2005 med Frigg), Går i fjøs (2009, barneplate med Bom Basker), Aurum (2008 med Gjermund Larsen Trio), Reise (2013 med Gjermund Larsen Trio)

 

Foreslå endringer i tekst

Foreslå bilder til artikkelen

Kommentarer

Har du spørsmål om artikkelen? Skriv her, så får du svar fra fagansvarlig eller redaktør.

Du må være logget inn for å kommentere.