Vest-Telemark Blad
Faktaboks
- Offisielt namn
- VEST-TELEMARK BLAD AS
- Organisasjonstype
- Aksjeselskap
- Forretningsadresse
- Kviteseid
- Stifta
- 02.07.1973
- Dagleg leiar
- Tor Arve Vartdal
- Styreleiar
- Per Stordrange
Historie
Oppstart
Vi må heilt til folkerøystinga om EEC i 1972 før Vest-Telemark var klar for eit livsdyktig avisprosjekt. Vesttelane var massivt mot EEC, og aktivistar i dei seks kommunane Seljord, Kviteseid, Nissedal, Fyresdal, Tokke og Vinje gjekk saman om å gje ut trykt materiell med nei-profil (sjå EU-kampen). Samstundes var begge dei store avisene i fylket, TA og Varden, sterkt ja-farga.
Då folkerøystinga var over, blei meiningskampen ført vidare med ei eiga lokalavis for Vest-Telemark som det klare målet. Også Studentmållaget i Oslo og Riksfondet for nynorsk presse støtta den nye avisa. Eit arbeidsutval førebudde skipinga av eit aksjeselskap, og 2. juli 1973 var Vest-Telemark Blad AS ein realitet.
Tore Skaug, ein hardhuda EEC-motstandar, blei redaktør. Bladstyret tinga seg til ei trykkeriavtale med Teledølens trykkeri på Notodden, der den gamle Venstre-avisa nyleg var lagt ned.
Drift
13. november 1973 kom det første nummeret, fire sider i fullformat. Dei fyrste åra kom avisa ut kvar tysdag og fredag, frå tidleg i 1975 trykt på eiga flattrykkrotasjonspresse i Kviteseid. I 1980 tok «Veslebladet» som avisa blei kalla, spranget over i offset, tabloidformat og tre utgåver i veka. Økonomisk sett var dei fyrste 10–15 åra ein hårfin balansegang, men leiinga greidde med ymse knep å halde det gåande. Det var også til god hjelp at dei tilsette godtok tilnærma likeløn.
Profil
Avisa snakka ingen etter munnen og kom derfor etter måten snøgt på folkemunne i Telemark. «Veslebladet» blei den uredde avisa mot straumen som få trudde ville overleve. Avisa nekta å tone politisk flagg. Debattinnlegga mellom redaktør og blant anna ordførarar var både tydelege og viljesterke. Engasjerte debattinnlegg frå lesarane med svar frå politikarar, eller krangel naboar imellom i all offentlegheit, er stadig noko av det stoffet folk les fyrst.
Opplagsmessig følgde Vest-Telemark Blad ei jamnt stigande kurve, og då avisa utpå 1980-talet hadde tilkjempa seg kontrollen med den lokale annonsemarknaden, var ein på trygg grunn. Med eit relativt solid kapitaltilskot frå kommunane og dei lokale sparebankane kunne avisa på same tid ta i bruk eit moderne avishus og ei god rotasjonspresse.
Vest-Telemark Blad vart ei inspirasjonskjelde for andre som ville starte lokalavis i distriktet i 1970-åra, mellom anna Dølaposten på Otta, som starta i 1978 og dekte fleire kommunar i Nord-Gudbrandsdalen.
Opplag
Opplagstall for Vest-Telemark Blad, 1986-2022
1986 | 4468 |
---|---|
1988 | 4809 |
1990 | 4780 |
1991 | 4780 |
1992 | 4963 |
1993 | 5393 |
1994 | 5242 |
1995 | 5354 |
1996 | 5458 |
1997 | 5550 |
1998 | 5690 |
1999 | 5739 |
2000 | 5883 |
2001 | 5156 |
2002 | 5502 |
2003 | 5519 |
2004 | 5517 |
2005 | 5425 |
2006 | 5472 |
2007 | 5493 |
2008 | 5530 |
2009 | 5660 |
2010 | 5675 |
2011 | 5632 |
2012 | 5571 |
2013 | 5603 |
2014 | 5521 |
2015 | 5484 |
2016 | 5307 |
2017 | 5268 |
2018 | 5119 |
2019 | 5563 |
2020 | 5536 |
2021 | 5593 |
2022 | 5731 |
År | Opplag |
---|---|
1974 | 2900 |
1976 | 2609 |
1978 | 3411 |
1986 | 4468 |
1993 | 5393 |
1999 | 5739 |
2008 | 5530 |
2020 | 5536 |
Statistikken viser frå 2020 netto opplagstal for både digitale abonnement og papirabonnement. Kjelda er opplagstala avisene rapporterer til Mediebedriftenes Landsforening (MBL) for andre halvår.
Les meir i Store norske leksikon
Eksterne lenker
Litteratur
- Almenningen, O. ofl. (1981): Norsk målreising i 75 år. Oslo: Fonna Forlag
- Bø, B., Dalland, Ø. & Stugu, O. S. (1974): Tre aviser i Bygde-Norge. Altaposten, Driva, Vest-Telemark Blad. Oslo: Samlaget
- Flo, I., red. (2010): Norsk presses historie 1660–2010. Norske aviser fra A til Å, bind 4. Oslo: Universitetsforlaget
- Grepstad, O. (2010): Avisene som utvida Noreg. Nynorskpressa 1850–2010. Oslo: Universitetsforlaget
Faktaboks
- Sektorkode
- 2100 Private aksjeselskaper mv.
- Næringskode(r)
- 58.140 Utgivelse av blader og tidsskrifter
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.