Telemarksavisa

Økonomien var eit konstant problem for avisa på Notodden. Det var han òg for Telemark Social-Demokrat i Porsgrunn, grunnlagd i 1922 og overteken av Arbeidarpartiet i 1926. Då sosialdemokratane og Arbeidarpartiet året etter gjekk saman, var også dei to avisene slått saman, og Telemark Arbeiderblad etablerte seg i Skien. Partiet hadde no eit talerøyr som dekte heile fylket, og partiet sentralt støtta drifta. I løpet av kort tid fekk avisa eige trykkjeri i eigne lokale. Olav Vegheim blei tilsett som redaktør i april 1928 og sat til 1940.

Kort etter at tyskarane okkuperte landet i 1940, overtok NS lokala, og personalet blei spreidd for alle vindar, men etter kapitulasjonen var medarbeidarane raskt tilbake, og alt 11. mai 1945 var avisa i gang att.

Ein hemsko var lenge at TA blei rekna for å vere eit «menighetsblad» – styrt av partiet og med mange og lange referat frå ulike partilag. Knut Kvigne var ein omstridd redaktør, entusiastisk til samnorsk, men skeptisk til Sosialistisk Folkeparti. Etter nokre sterke utsegner ei oppheta valnatt i 1961 måtte han gå. Haakon Lie «kalla» Alf Skaaum til jobben, og han sat som redaktør i 22 år.

I 1960-åra blei det gjort store investeringar mellom anna i det tekniske utstyret, men det kosta. Utover i 1980-åra slo økonomiske krisetider nasjonalt inn for fullt og ramma avisa brutalt. Jappetid, renteauke og høg arbeidsløyse førte til at annonseinntektene gjekk drastisk ned. I 1984 gjekk opplaget ned for første gong, medan Varden greidde seg betre og auka opplaget.

1980-åra og inngangen på 1990-talet var ei samanhengande krisetid for Telemark Arbeiderblad med indre uro, forvirring og svak styring på fleire plan. I 1985 vart dei første medarbeidarane oppsagde. I 1991 trudde ein at overgang til tabloidformat var løysinga, men lesarane var tydelegvis misnøgde. Opplaget sank med rundt ti prosent, medan Varden auka tilsvarande og hadde eit opplag som var nesten 10 000 høgare enn konkurrenten. I 1991 var avisa i ferd med å gå over ende. 33 medarbeidarar måtte gå. Det førte til sterk intern strid. Om lag samstundes gjekk avisleiinga til Varden og tilbaud avisabedrifta for ein symbolsk sum. Men Varden avslo.

I 1992 starta ei ny økt med fleire drastiske grep. Sjølv om A-pressa kom inn som eigar, vedtok ein at bindinga til Arbeidarpartiet skulle kuttast og namnet endrast til Telemarksavisa. I 1996 vart pressa seld og trykkinga overført til Larvik. Seinare statssekretær og redaktør Jan Erik Larsen vart sett til å leie omstillingsarbeidet. Dette prega perioden 1992-1998 med store endringar i avisproduktet. Etter ei tid kom synlege resultat med jamt stigande opplagstal. I åra som følgde var det Varden som gjekk kraftig tilbake i opplag, medan Telemarksavisa vaks tilsvarande. Ved siste måling – i 2023 – hadde TA eit opplagstal som var nær 7000 høgare enn Varden.