Tina Bru er politikar, 2. nestleiar i Høgre sidan 2020 og stortingsrepresentant for Høgre frå Rogaland sidan 2013. Ho er tidlegare olje- og energiminister i regjeringa Solberg i 2020–2021.
Faktaboks
Tina Bru
- Fødd
- 18. april 1986, Moss, Viken
Bakgrunn
Tina Bru er fødd i Moss i Østfold (no Viken). Ho tok ein bachelorgrad i engelsk og religion ved Universitetet i Stavanger i 2006–2008 og tok ein bachelorgrad med fordjuping i endringsleiing frå BI i Stavanger frå 2010–2012.
Politisk karriere
Bru melde seg inn i Unge Høgre i 2005, var 2. nestleiar og fylkessekretær for Rogaland Unge Høgre i 2006–2007, deretter fylkesleiar i 2008–2009 og medlem av sentralstyret i Unge Høgre i 2008–2010. Ho var representant for Høgre i kommunestyret i Stavanger i 2007–2012 og i fylkesstyret i Rogaland i 2011–2013. Ho var òg politisk rådgivar for Stavanger Høgre i 2008–2010, for Rogaland Høgre i 2011–2012 og for fylkesordføraren i Rogaland i 2011–2013.
Bru var vararepresentant for Høgre frå Rogaland på Stortinget i 2009–2013. Ved stortingsvalet i 2013 blei ho vald inn som stortingsrepresentant for Høgre frå Rogaland og attvald for periodane 2017–2021 og 2021–2025. På Stortinget har ho vore medlem og nestleiar i energi- og miljøkomiteen, fram til ho blei statsråd i 2020. Ved Høgre sitt landsmøte i september 2020 blei Bru valt til 2. nestleiar i partiet, og ho tok dermed over for dåverande helseminister Bent Høie.
I januar 2020 blei Bru olje- og energiminister i regjeringa Solberg, etter at Sylvi Listhaug gjekk av då Framstegspartiet trekte seg frå regjeringssamarbeidet. Bru gjekk av som olje- og energiminister ved regjeringsskiftet hausten 2021. Ho vart attvald som stortingsrepresentant ved stortingsvalet i 2021 og vart fyrste nestleiar i finanskomiteen på Stortinget for perioden 2021–2025.
Bru er feminist og utfordrar konservative delen av Høgre sin politikk, spesielt i familie- og likestillingspolitikken. Bru vil avskaffe både kontantstøtta og barnetrygda, og ho er for eggdonasjon. Då to av biskopane i den norske kyrkja meinte at Noreg måtte bremse oljeutvinninga, melde ho seg ut av kyrkja. Ho er for ein aktiv oljepolitikk med mindre utslepp.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.