Sandawefolket og andre nyttar nemninga Usandawe om området der dette folket bur og der sandawespråket blir tala, men det er inga offisiell administrativ eining. Området er om lag 65 x 70 kilometer stort, og er mellom dei fattigaste områda i Tanzania.
Store delar av det nordlege Usandawe er bortimot folketomt, både fordi det er eit område med mykje tsetsefluer og fordi folk blei tvangsflytta derfrå i samband med det tanzanianske Ujamaa-programmet på 1970-talet, då folk blei samla i landsbyar.
Det finst ikkje noko nøyaktig tal på kor mange som snakkar sandawe, men det blei estimert til om lag 60 000 menneske kring år 2010. Det finst mindre grupper av sandawetalarar i byane Dodoma, Arusha og Dar es Salaam. Sandawe blir rekna som livskraftig. Det blir overført til nye generasjonar, og er i vanleg bruk i alle aldersgrupper.
Mange blant sandawefolket snakkar ein del swahili, språket i grunnskule og administrasjon – og det offisielle og nasjonale språket i Tanzania.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.