Knut Aastad Bråten

Knut Aastad Bråten er fødd på Fagernes i Nord-Aurdal i Oppland (no Innlandet). Bråten er utdanna etnolog og kulturhistorikar ved Universitetet i Oslo (2006). Temaet for hovudfagsoppgåva var det kulturelle møtet mellom bygdefolk og hytteturistar på Beitostølen fram til rundt 1980.

Frå 2007 til 2013 var Bråten redaktør i Spelemannsbladet, som i 2010 fekk namnet Folkemusikk. Frå 2013 til 2020 hadde han same stillinga i tidsskriftet Syn og Segn. Bråten har sidan 2018 vore spaltist i avisa Nationen, der han skriv om norsk kultur- og distriktspolitikk.

Bråten har hatt mange frivillige verv og har vore med i ulike kulturelle prosjekt. Han var tidlegare medlem i fagkomiteen for immateriell kulturarv i Norsk kulturråd (2015–2019). Han har òg skrive bøker. Saman med Knut Olav Åmås har han gitt ut reisebøkene New York – 100 unike opplevelser (2013) og Wien – 100 unike opplevelser (2016).

I januar 2020 vart Bråten statssekretær i Kulturdepartementet under kulturminister Abid Q. Raja, men allereie i mai same året trekte han seg i protest mot det han kalla politisk ukultur. Bråten har vore medlem av kommunestyret i Nord-Aurdal for Venstre sidan 2016.

Saman med tvillingbroren Ole Aastad Bråten er Knut Aastad Bråten ein av dei fremste utøvarane i landet på det gamle instrumentet langeleik. Dei har vunne klassen for langeleik på Landskappleiken fleire gonger. Knut Aastad Bråten vann kongepokalen under Landskappleiken på Beitostølen i 2006. Brørne har vore med på fleire albuminnspelingar, til dømes I jolo (1998) og Snart lyset sig mon svinge (2006). I 2015 gav dei ut instrumentalalbumet Til Ragna, som vart nominert til Spellemannprisen. I desember 2020 vart han tilsett som dagleg leiar for Jørn Hilme-stemnet, som er Noregs eldste folkemusikkfestival.

• norsk folkemusikk
• Jørn Hilme-stemnet
• statssekretær
• Kulturdepartementet

• Kagge forlag si forfattarside om Knut Aastad Bråten