Sogn Avis

.
Lisens: Begrenset gjenbruk

Artikkelstart

Sogn Avis er ei avis som kjem ut på Leikanger i Vestland. Sidan 2002 har avisa vore einerådande som papiravis og lokalavis i indre Sogn. Sogn Avis kjem ut på nett og fem dagar i veka på papir.

Etablering

Sogn Avis vart skipa i 1993 og kom ut første gongen 7. januar det året. Avisa blei starta som eit resultat av at høgreorganet S/SA (Sogningen/Sogns Avis) og venstreavisa Sogn og Fjordane slo seg saman, som ei tydeleg markering av at det var slutt for partipressa i Sogn.

Drift

Sogn Avis er organisert gjennom eit aksjeselskap som i byrjinga var heileigd av familien Husabø på Leikanger. Samanslåinga i 1993 gav den nye avisa ein sterk posisjon på avismarknaden i Sogn. A-pressa (no Amedia), som eigde konkurrenten Sogn Dagblad, gjorde fleire forsøk på å kjøpe seg inn i avisa, men først i 1999 fekk konsernet hand om ein blokkerande eigarpost i Sogn Avis, gjennom Firda Media AS. Denne handelen var eit kompromiss der Amedia samtidig la ned Avisa Sogndal og selde Årdal og Lærdal Avis til Sogn Avis. I 2019 kjøpte Amedia 89,5 % av aksjane i Sogn Avis, og blei med det eineeigar, sidan konsernet allereie eigde 10,5 % gjennom Firda Media.

Sogn Avis har lokalkontor i Sogndal og Årdal. Redaktørar har vore Gerhard Haugland (1993–2000), Jan Inge Fardal (2000–01, 2003–04 og 2005–2020), Kai Aage Pedersen (2001–03), Rune Timberlid (2004–05) og Eli Grotle og Arve Uglum (2020–).

Sogn Avis blei fram til 2006 trykt i eige trykkeri i Leikanger, seinare i Førde. Avisa har alltid hatt nynorsk som målform.

Utbreiing

Trass i monopolstilling på den lokale avismarknaden i Sogn aust for Høyanger, har ikkje Sogn Avis klart å auke opplaget. Som så mange andre papiraviser har Sogn Avis fått merke den sterke tevlinga frå internett. Det beste året var 2003, med 11 325 i opplag. I 2019 var opplaget på 8118.

Med Amedia som medeigar, fekk Sogn Avis frå 2000 høve til å utvikle ei nettavis innanfor rammene til Amedia si nettsatsing. I 2005 tok avisa eit skritt nærare å bli eit komplett mediehus. Sogn Avis overtok då nærradioen P-Vest i Sogndal.

Redaksjonell profil

Sogn Avis er først og fremst ei lokalavis med brei dekning av nyhende og samfunnsliv i nedslagsfeltet indre Sogn. Avisa har heile tida vore partipolitisk uavhengig.

I 1999 inngjekk Sogn Avis eit annonsesamarbeid med avisene Firda og Firdaposten under namnet Sogn og Fjordane Samkøyringa. I 2011 vart dette utvida ved at fire aviser i Hordaland kom med, og namnet vart endra til Media Vestlandet AS. Media Vestlandet AS blei lagt ned i 2011, og Sogn Avis inngjekk annonsesamarbeid gjennom Amedia Marked.

I 2015 vart Sogn Avis kåra til Årets lokalavis.

Les meir i Store norske leksikon

Eksterne lenker

Litteratur

  • Eggum, T. (2009): På trykk. Avisene i Sogn og Fjordane 1874–2009. Førde: Selja Forlag
  • Grepstad, O. (2010): Avisene som utvida Noreg. Nynorskpressa 1850–2010. Oslo: Universitetsforlaget

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg