Hallingdølen (avis)

Hausten 2011 innførte Hallingdølen som den første avisa i Noreg betalingsmur for ikkje-abonnentar som ville lese avisa på nettet. Hallingdølen publiserer stoffet på dei ulike digitale flatene, og lagar i tillegg podkasten «Høyr». Det gjennomsnittlege talet på daglege lesarar på nett og papir var 15 213 i fjerde kvartal 2023, viser statistikken frå Mediebedriftenes Landsforening.

Hallingdølen kom med første nummeret 2. oktober 1936 og starta regulær drift frå 6. november same året. Avisa var skipa som eit einmannstiltak av saudabuen Jon Fatnes, og kom dei første åra med eitt nummer i veka. Kvart nummer var på fire sider. Avisa skulle vere eit upolitisk lokalblad for Hallingdal, skulle stå for nasjonale verdiar, kristendom og sivilisert åtferd mellom menneske, og ho skulle likestille bokmål og nynorsk. Hallingdølen vart stoppa i mai 1941 og tok opp att drifta etter krigen 7. juni 1945. I 1946 fekk Fatnes arbeid i Stavanger Aftenblad, og eit lutlag av åtte bygdefolk kjøpte avisa. Fatnes stilte som vilkår at bokmål og nynorsk skulle vere likeleg fordelt.

Dei første åra vart avisa prenta på Voss. I 1948 fekk avisa eige trykkjeri. Ho fekk sitt eige fotoapparat i 1950, og flytta inn i eige hus i 1976. Avisa har avdelingskontor på Nesbyen og definerer seg som partipolitisk uavhengig lokalavis for Hallingdal.

Redaktørar har vore: Jon Fatnes (1936–1945), Lars Tormodsgard (mellombels 1946), Tor Jonsson (siste halvåret 1946), Torgeir Lid (1947–1955), Lars S. Strand (1956–1976), Sigbjørn Tormodsgard (1. juli 1976–1998), Bjarne Tormodsgard (1999–2016), Embrik Luksengard (2017–2019) og Lillian Holden (2019 – ).

Eigar er Hallingdølen AS

Hallingdølen har fire gonger blitt kåra til Årets lokalavis av Landslaget for lokalaviser – i 2005, 2008, 2013 og 2015 – og har fleire gonger vunne prisar i European Newspaper Award. I november 2013 vart avisa kåra til den beste lokalavisa i Europa under European Newspaper Award. 211 aviser frå 25 land deltok i konkurransen.

Opplagstala til og med 2015 gjeld berre for papirutgåva. Frå og med 2020 reknar ein netto opplagstal for digitalt abonnement og papirabonnement. Kjelda er opplagstala avisene rapporterer til Mediebedriftenes Landsforening (MBL) for andre halvår.

• Første nummer av Hallingdølen kom ut 2. oktober 1936.

• norsk presses historie
• avis
• lokalavis

• Hallingdølen

• Idar Flo (red.): Norsk presses historie, bd. 4. Oslo 2010
• Buskerud krets av Norsk Presseforbund: Pressen i Buskerud. 1917–1947. Drammen [1947]
• Ottar Grepstad: Avisene som utvida Noreg. Oslo 2010
• Norske aviser 1763–1969. En bibliografi. Universitetsbiblioteket i Oslo 1973
• Kåre Olav Solhjell: Lokalavisa vår 50 år. Hallingdølen 1936–1988. [Gol 1988]