Agnes Ravatn

Faktaboks

Agnes Ravatn
Født
8. februar 1983, Ølen i Vindafjord, Rogaland
Agnes Ravatn.
Av /Samlaget.
© Det norske Samlaget
.
Lisens: Begrenset gjenbruk

Artikkelstart

Agnes Ravatn er forfattar og journalistisk essayist med ei observant, frekk og morosam form.

Bakgrunn

Agnes Ravatn er fødd i Ølen i Vindafjord i Rogaland. Ho har teke grunnfag i musikk i 2003 og engelsk i 2004 og bachelorgrad i nordisk i 2005–2007 ved Universitetet i Bergen. Ho tok årskurs i skapande skriving ved Skrivekunstakademiet i Hordaland (2005). Ho har arbeidd i avisa Dag og Tid og vore spaltist i Dagbladet.

Forfattarskapen

Ravatn debuterte som forfattar i 2007 med den kritikarroste romanen Veke 53, om den misnøgde, skilde og middelaldrande lektoren Georg Ulveset. Året etter kom fanzinen Ikke til hjemlån, som ho gav ut saman med Kjersti Rorgemoen, Anja Ulset og Mari Ulset. Ordet fanzine er sett saman av dei engelske orda fan og magazine. Med boka utfordra dei den litterære tidsånda og den såkalla gode smaken gjennom kollasjar, teikningar og tekstar.

I 2009 kom essaysamlinga Stillstand. Sivilisasjonskritikk på lågt nivå. Ravatn gir her eit humoristisk og kritisk portrett av det moderne Noreg. Det er ei samling av «reisebrev frå stader der ingenting skjer», som ho hadde skrive i Dag og Tid. I 2011 gav ho ut Folkelesnad, ei essaysamling om vekeblad. Tekstane var også denne gong opphavleg publisert som ein serie i Dag og Tid. Ravatn er svært kunnskapsrik og har ein ironisk, frekk og uventa skrivemåte, der ho gjer lite for å skjule seg sjølv.

I samband med stemmerettsjubileet som markerte hundre år med røysterett for kvinner i 2013, gav Ravatn ut langdiktet Ikkje som var ei av 12 bøker i serien Stemmer. Prosjektet ville vise kva kvinner vil seie, ikkje kva det vil seie å vere kvinne.

I 2013 gav ho ut romanen Fugletribunalet om TV-programleiaren Allis som begynner eit nytt og anonymt liv som hushjelp for Sigurd Bagge. Romanen dreier seg om skuld og skam og det å begynne på nytt. I 2014 kom boka Operasjon sjølvdisiplin, ei underhaldande sjølvhjelpsbok som byggjer på ein artikkelserie i Dag og Tid. Sidan har ho gitt ut essaybøkene Verda er ein skandale. Ei lita bok om livet på landet (2017) og Stoisk uro og andre filosofiske smular (2018), og romanen Dei sju dørene (2019).

Anna litterært engasjement

Saman Kjersti Rorgemoen hadde ho bloggen Blodklubb (2005–2007). Ravatn og Trygve Åslund var redaktørar for Gi lyd (2008), som er ei samling tekstar av Kjartan Fløgstad, og ho omsette Skatten på Sjørøvarøya for Det Norske Teatret i 2011.

Utmerkingar

Ravatn fekk Natt og Dags Bergenspris i 2007 for Veke 53, og vart i 2011 nominert til Brageprisen i 2011 for Folkelesnad. Same året fekk ho Språkprisen 2011. I 2013 vart ho tildelt Hestenesprisen og fekk same året Romanprisen, delt ut av lyttarar i NRK P2. I 2014 fekk ho Ungdommens Kritikarpris for romanen Fugletribinalet. I 2015 vart Ravatn kåra av Morgenbladet og Norsk Litteraturfestival til ein av dei ti beste forfattarane under 35 år. Agnes Ravatn var festspeldiktar for Dei nynorske festspela i 2014.

Bibliografi

  • Dei sju dørene (Roman, Samlaget, 2019)
  • Stoisk ro og andre filosofiske smular (Sakprosa, Samlaget, 2018)
  • Verda er ein skandale. Ei lita bok om livet på landet (Sakprosa, Samlaget, 2017)
  • Operasjon sjølvdisiplin (Sjølvhjelpsbok, Samlaget, 2014)
  • Fugletribunalet, (Roman, Samlaget, 2013)
  • Folkelesnad (Sakprosa, Samlaget, 2011)
  • Stillstand: sivilisasjonskritikk på lågt nivå (Sakprosa, Samlaget, 2009)
  • Ikke til hjemlån (Sakprosa, Samlaget, 2008)
  • Veke 53 (Roman, Samlaget, 2007)

Les meir i Store norske leksikon

Eksterne lenker

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg