Bygdanytt

Avishode til Bygdanytt
Bygdanytt.
Då redaktør Sigurd Mjeldheim døydde i 1967, stod avisa i fare for å bli lagd ned. Eigaren av Foto sentrum, fotograf Per Presthus, hadde i fleire år vore tilknytt Bygdanytt. Presthus spurde svogeren sin, Ragnvald Røiseth (biletet), om han kunne ta på seg redaktørjobben. Røiseth sa ja til det, og var redaktør til 1979. Presthus kjøpte Bygdanytt for 5000 kroner, og i 1969 overtok han også trykkinga av avisa.
Ragnvald Røiseth
Bygdanytt.

Artikkelstart

Bygdanytt er lokalavis for Arna i Bergen og for Osterøy, grunnlagt i 1951. Avisa har kontor i Arna og kjem ut på papir to dagar i veka. Avisa har Schibsted som eigar. Redaktøren i Bygdanytt er frå 2018 og redaktør i bladet Strilen.

Historie

Bygdanytt kom ut med det første nummeret 20. april 1951 og er den eldste lokalavisa i tidlegare Hordaland. Avisa var opphavleg lokalblad for den tidlegare kommunen Haus, som i dag er slått saman med Bergen og med Osterøy.

Bygdanytt var likevel ikkje første forsøket på å skape lokalavis for dette området. Johannes Revheim og Sigurd Mjeldheim hadde tidlegare skipa Haus Bygdeblad, men på grunn av usemje gjekk Mjeldheim ut og skipa sitt eige blad, Bygdabladet. Mjeldheim heldt på undertittelen «Upolitisk bygdeblad for Haus og næraste kommunar» også i denne avisa, og seinare same året skifta avisa namn til Bygdanytt.

Etterfølgjaren etter Haus Bygdeblad, Sambygdingen, skulle vere lokalblad for Haus og Åsane, men måtte gi seg allereie året etter. I 1996 fekk Bygdanytt ein ny konkurrent på Osterøy, Ostringen, men denne avisa måtte gi seg i 2007. Med unnatak av eit opphald i åra 1956 til 1959 har Bygdanytt kome ut heile tida sidan starten i 1951.

Bygdanytt døydde heller ikkje etter sterk urbanisering i området på 1960- og 1970-talet. Tvert om var det avisa som berga bygdeidentiteten, og avisa greidde også å halde oppe sambandet mellom Arna og dei delane av Osterøy som naturleg sokna mot Arna. Med den nye Osterøybrua i 1997 blei sambandet mellom fastland og øy knytt på nytt.

Avisa hadde frå starten av lokale eigarar. I 2005 vart ho kjøpt opp av Bergens Tidende, og vart seinare ein del av Schibsted-konsernet. Avisa har både bokmål og nynorsk som redaksjonelt språk. Bygdanytt vart kåra til den beste lokalavisa i Europa i 2012. Bygdanytt har ei moderne nettavis, som prioriterer nyhende.

Opplag

År Opplag
1970 1905
1991 4126
2008 4587
2015 4213
2017 4359
2020 5066
2021 5042

Opplagstal i 2015 var 4213 for papiravisa og 4049 for sal av digitale abonnement og utgåver. Totale lesartal for papir og digitalt, inkludert ope innhald ein gjennomsnittsdag i 2015 var 10 000 (Mediebedriftenes Landsforening). Til og med 2015 gjeld opplagstala berre papirutgåva. Frå 2020 nyttar ein netto opplagstal for digitalt abonnement og papirabonnement.

Les meir i Store norske leksikon

Eksterne lenker

Litteratur

  • Kjartan Rødland: «Bygdanytt», Norsk presses historie 1660–2010, bd. 4. Oslo 2010
  • Tom Arbo Høeg: Norske Aviser 1763–1969. Oslo 1973

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg