Thomas Christian Wyller

Faktaboks

Thomas Christian Wyller
Thomas Christian Fredrik Wyller
Født
16. september 1922, Stavanger, Rogaland
Død
24. april 2012, Oslo

Artikkelstart

Thomas Christian Wyller var professor, statsvitar og samfunnsdebattant. Han var med på å byggje opp statsvitskap som akademisk fag i Noreg, tok den første norske doktorgraden i faget og var professor ved Universitetet i Oslo i nærare 25 år.

Bakgrunn

Thomas Christian Frederik Wyller var fødd i Stavanger i Rogaland og døydde i Oslo. Han var bror til Egil A. Wyller. Han tok examen artium ved Stavanger katedralskole i 1941, var med i motstanden under den tyske okkupasjonen og sat på Grini i tre år, og studerte etter frigjeringa i København, Oslo og Paris.

Statsvitskap

Statsvitskap var blitt etablert som fag ved Universitetet i Oslo i 1947, og Wyller tok magistergraden i faget i 1951 på ei avhandling om Thomas Paine. Han disputerte i 1958 til doktorgradenavhandlinga Nyordning og motstand, ein studie av den rolla norske organisasjonar spela under den tyske okkupasjonen. Det var den første doktorgraden i statsvitskap i Noreg.

Wyller var fungerande dosent i statsvitskap ved Universitetet i Oslo i 1954–1956, dosent frå 1957 og professor i 1968–1992. Han hadde sine røter i den politisk-historiske delen av statsvitskapen, var oppteken av ideologiar og idear si rolle i politiske prosessar og arbeidde særleg med moderne norsk politisk historie.

Debattant

Wyller var ein aktiv samfunnsdebattant. Han var ein av dei første som tok opp miljø- og ressursspørsmål i Noreg og engasjerte seg i striden om medlemskap i EF/EU, som han gjekk mot. Eit større utval av debattartiklane frå 1940 til 2007 er samla i boka Ytringer (2007).

Han gav ut mellom anna Frigjøringspolitikk (1963, om regjeringsskiftet sommaren 1945), Vårt politiske system (1970), Christian Michelsen. Politikeren (1975), Motforestillinger 1–4 (1975–1978, saman med Kari Bruun Wyller), Skal folket bestemme? Folkeavstemning som politisk prosess (1992) og Demokratiet og miljøkrisen (1999).

Andre verv og engasjement

Wyller var redaktør av tidsskriftet Ungdom, eit blad som kom ut i 1945–1946, starta av ei gruppe tidlegare fangar på Grini med det siktemålet å medverke til eit levedyktig demokrati. Han var formann i Det norske Studentersamfund i 1948 og formann i Norsk statsvitenskapelig forening i 1958–1961.

Utmerkingar

I 2000 vart han tildelt Fritt Ords pris for sitt bidrag til norsk samfunnsdebatt gjennom fleire tiår.

Les meir i Store norske leksikon

Litteratur

  • Bredo Berntsen: Thomas Christian Wyller. Bibliografi 1951–2011. Oslo 2012
  • Stein Kuhnle (red.): Det politiske samfunn. Linjer i norsk statsvitenskap. Oslo 1986
  • Tryggve Juul Møller (red.): Studentene fra 1941. Oslo 1966

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg