Tambarskjelvar Idrettslag

Tambarskjelvar Idrettslag vart skipa under namnet «Hermod» i 1905. Laget dreiv i starten med gymnastikk, turn, friidrett og ein leik dei kalla «holmgang».

Den første leiaren var Jakop Slettemark, men då han reiste til USA i 1907 vart idrettslaget liggande passivt. Først i 1914 vart laget starta opp igjen, og då skifta initiativtakarane namn til Tambarskjelvar. Namnet kan truleg forklarast med at det var namnet på eit tidlegare skyttarlag i bygda. For eit skyttarlag var det logisk å ta namn etter den kjende bogeskyttaren Einar Tambarskjelvar.

Etter krigen stod friidretten sterkt i idrettslaget, og Tambarskjelvar vann for første gong Breimstafetten i 1951. Laget vann stafetten til saman ni gongar. Dette gjorde Tambarskjelvar sine løparar kjende i heile Sogn og Fjordane.

I 1952 vart Norvald Herstad nummer to i NM i tikamp. Seinare vart han norsk meister, men då representerte han Gular i Bergen. Tambarskjelvar var òg moderklubben til Gular-løparen Håkon Fimland, som vart norsk meister på 110 meter hekk seks gongar i perioden 1971–1976.

Tambarskjelvar arrangerte for første gong Naustdalstafetten i 1955. I 1981 vart den nye idrettsbana ved Naustdal barne- og ungdomsskule teken i bruk.

Tambarskjelvar var i 1996 representert med to utøvarar under OL i Atlanta. Merita Berntsen vart nummer ni i sandvolleyball, medan Stian Grimseth enda på tiandeplass i vektløfting. Grimseth var òg med i OL i 2000 og 2004.

Ei vektløftargruppe vart skipa i 1980, men lagt ned allereie tre år seinare. Først i 1994 vart det skipa ny vektløftargruppe i Tambarskjelvar.

Stian Grimseth deltok i OL i vektløfting tre gongar. Han vart i 1996 europameister i rykk i Stavanger, noko han òg greidde året etter. Frå 1995 til 2004 tok Grimseth ti kongepokalar på rad. Også lagkameraten Geir Grønnevik har ein kongepokal i vektløfting.

Tambarskjelvar var arrangørklubb for EM i vektløfting i Førde og Naustdal i 2016.

Volleyballgruppa vart skipa i 1971. Damelaget debuterte i førstedivisjon (svarande til eliteserien i dag) med ein sensasjonell andreplass i sesongen 1981–1982.

Sidan hevda damelaget seg heilt i noregseliten fleire gongar, inntil aktiviteten utover på 2000-talet fall bort og seniorsatsinga vart lagd ned.

Blant dei mest kjende spelarane frå Tambarskjelvar er Merita Berntsen Mol, Jetmund Berntsen og Hilde Elvebakk.

• Vektløfting
• Volleyball
• Stian Grimseth
• Merita Berntsen Mol

• Tambarskjelvar Idrettslag sine nettsider

• Åsmund Berthelsen og Ivar Myklebust Longvastøl: Eldsjeler, dugnad og talent. Tambarskjelvar Idrettslag gjennom 100 år (2008)