Sunnhordland er ei lokalavis på Stord som frå våren 2024 kjem ut i papirformat på Leirvik to gonger i veka. Avisa har Stord og nabokommunane som primært nedslagsfelt. Sunnhordland er ei av dei eldste i Vestland, og var lenge ei av dei få familieeigde avisene i landet. I 2020 overtok Polaris Media aksjemajoriteten i Sunnhordland.
Ansvarleg redaktør frå 2022 til 2024 var Marit Holm.
Sunnhordland publiserer stoffet både på nett og papir. Nettavis vart første gong utgitt i 2006. Sunnhordland lagar podkasten Stord-podden. Ifølgje statistikk frå Mediebedriftenes Landsforening er det gjennomsnittlege talet på lesarar av papir- og nettutgåva totalt 16 216 (fjerde kvartal 2023).
Stord fekk si første lokalavis allereie i 1902. 1. mai det året kom det først eit prøvenummer av ei ny avis, Søndhordland. Det er denne avisa som no kjem ut med namnet Sunnhordland.
Søndhordland vart grunnlagd av Jens Hystad, ein tidlegare skomakar som likte å skrive, sjølv om han var blind. Dette klarte han med god hjelp av kona og andre gode medarbeidarar. Til å starte avis fekk han eit lån på 400 kroner. Hystad var venstremann, kjempa for folkestyre, sosiale reformer og målsak, og lét dette setje sitt preg på avisa. I striden før folkerøystinga om EF (EU) i 1972 gjekk avisa inn for norsk medlemskap.
Cornelius Bergh Bugge, målmann og storinvestor, kjøpte i 1918 ein stor aksjepost i avisa. Ved årsskiftet 1918–1919 skifta avisa namn til Sunnhordland, og landsmålet vart redaksjonell målform. Avisa har også i dag nynorsk som redaksjonelt språk.
I 1949 trekte Jens Hystad seg tilbake og lét borna overta. I dag er det fjerde generasjon Hystad som er medeigarar i avisa.
Alle utgåver av avisa frå starten i 1902 kan lesast som e-avis for abonnentar.
Sunnhordland vart i 2017 kåra til Årets lokalavis av Landslaget for lokalaviser.
| 1986 | 8344 |
|---|---|
| 1988 | 8250 |
| 1990 | 8202 |
| 1991 | 8206 |
| 1992 | 8175 |
| 1993 | 8238 |
| 1994 | 8253 |
| 1995 | 8260 |
| 1996 | 8215 |
| 1997 | 8401 |
| 1998 | 8515 |
| 1999 | 8583 |
| 2000 | 8506 |
| 2001 | 8400 |
| 2002 | 8242 |
| 2003 | 8179 |
| 2004 | 8183 |
| 2005 | 8185 |
| 2006 | 7985 |
| 2007 | 7832 |
| 2008 | 7832 |
| 2009 | 7498 |
| 2010 | 7137 |
| 2011 | 7036 |
| 2012 | 6697 |
| 2013 | 6559 |
| 2014 | 6571 |
| 2015 | 6218 |
| 2016 | 6129 |
| 2017 | 6099 |
| 2018 | 6296 |
| 2019 | 6467 |
| 2020 | 6638 |
| 2021 | 6833 |
| 2022 | 7032 |
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.