Reimund Kvideland

Faktaboks

Reimund Kvideland
Født
28. januar 1935, Høyland, Rogaland
Død
6. juni 2006, Bergen, Vestland

Artikkelstart

Reimund Kvideland var professor i folkloristikk ved Universitetet i Bergen.

Bakgrunn

Reimund Kvideland var fødd i Høyland (no Sandnes) i Rogaland og døydde i Bergen i Hordaland (no Vestland). Etter studiar i Oslo, København og Frankfurt am Main, tok han magistergraden i folkeminnevitskap, og i 1966 vart han tilsett som universitetslektor i Bergen. Mellom 1991 og 1997 var han direktør for Nordic Institute of Folklore i Åbo.

Folkloristikk-forskinga

Som forskar hadde han eit breitt interessefelt: barnetradisjon og samtidstradisjon, men også folkeleg religiøsitet, eventyr og folkelege viser. På mange område var han ein nybrotsmann. I viseforskinga lanserte han til dømes songaktivitet som forskingsfelt, og generelt var han meir interessert i repertoarproblematikk og tradisjonsprosess enn tekstanalyse. I 1971 starta han tidsskriftet Tradisjon, som kom til å leggje hovudvekta på folklore frå notida. Tidsskriftet vart populært langt ut over gruppa av nordiske folkloristar.

Kvideland hadde eit stort fagleg nettverk, særleg i tysktalande land og i USA. Han hadde også mange faglege verv, mellom anna var han president både i Société Internationale d'Ethnologie et de Folklore og i International Society for Folk Narrative Research.

Les meir i Store norske leksikon

Litteratur

  • Klintberg, Bengt af: Kompetansevurdering av Reimund Kvideland ved personlig opprykk til professor, manus. 1999
  • Reme, Eva 2013 “Reimund Kvideland (1935-2006)” i: Rogan, Bjarne og Eriksen, Anne (red.) 2013. Etnologi og folkloristikk. En fagkritisk biografi om norsk kulturhistorie, Novus forlag, Oslo.
  • Wienker-Piepho, Sabine: In memoriam Reimund Kvideland, manus til minneord ved Kommission für Volksliedforschungs internasjonale balladekonferanse i Lochals. 2007

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg