Endre Mørck

Etter examen artium på latinlinja gjekk Mørck på språkkurs i Oxford våren 1972 og kom inn på Forsvarets russiskkurs der han tok eksamen hausten 1973. I fagkrinsen sin frå Universitetet i Oslo har han russisk mellomfag, språkvitskap med fonetikk grunnfag og nordisk mellomfag og hovudfag. Språkinteressa hans har gjennom skolegangen og heile studietida vore i brennpunktet.

Etter avslutta embetseksamen var Mørck stipendiat ved Agder distriktshøgskole og amanuensis i vikarstilling ved Telemark distriktshøgskole før han kom til Tromsø som førsteamanuensis i nordisk språkvitskap i 1988. Frå 1995 var han professor i norrøn filologi.

Mørck var instituttleiar ved Institutt for språkvitskap ved UiT mellom 2005 og 2013. Han har i tillegg hatt ei rekkje andre verv, både faglege og administrative, internt på UiT, nasjonalt og internasjonalt. Han var ein omtykt administrator og leiar, grundig og etterretteleg og ikke minst rettvis.

Alt som hovudfagsstudent tok Mørck fatt på det som gjennom eit langt forskarliv skulle stå i brennpunktet for interessa hans, språket i den mellomnorske perioden. Han skreiv hovudfagsavhandling om «Passiv i mellomnorske diplom». Mellomnorsk er det språket som blei tala og skrive i seinmellomalderen, frå om lag 1350 til 1536, altså fram til reformasjonstida. Sjølve nemninga mellomnorsk har vore noko omstridt; somme språkforskarar har peika på at fleire av dei aktuelle språkendringane i tidsepoken skjedde alt på 1200-talet og at mellomnorsk såleis er å sjå på som den siste perioden i gammalnorsk tid. Mørck analyserer perioden som ein overgangsperiode mellom gammalnorsk og moderne norsk (nynorsk). Datagrunnlaget for arbeida til Mørck er primært henta fra Diplomatarium Norvegicum. Dette er ei stor samling norske brev og dokument frå tida fram til om lag 1570.

Mørck har i hovudsak arbeidd med mellomnorsk, anten mellomnorsk isolert eller i eit utviklingsperspektiv fram- og/eller bakover i tid. I tillegg har han publisert om andre lingvistiske tema, først og fremst syntaks (særleg historisk syntaks). Hans syntaksekspertise kjem tydeleg til uttrykk ved at det var han som blei vald til å skrive generelt om syntaks i band I («Mønster») i det store firebandsverket om norsk språkhistorie som blei publisert mellom 2016 og 2018. Han skreiv òg om seinmellomalderen (1350–1536) i band IV («Tidslinjer»). Mørck har òg publisert artiklar om mellom anna dialektar og personnamn.

Mørck har brei undervisningserfaring og har undervist i ei rekkje faglege disiplinar, også fleire som ligg langt frå spesialfelta hans. Han har òg halde føredrag og presentasjonar i inn- og utlandet om mange ulike tema. Han har deltatt i mange redaksjonsutval og har vore med på å redigere fleire bøker.

Mørck var medlem av Norsk språkråd i perioden 1996–1999, sat i ei språkpolitisk referansegruppe under Nordisk ministerråd og var med i ei styringsgruppe for å opprette eit norsk universitetssenter i St. Petersburg mellom 1995 og 1997.

Som professor emeritus er Mørck framleis fagleg aktiv og held fram med å forske på mellomnorsk.

• mellomnorsk