Grete Riise er lærar, rådgivar og tidlegare dagleg leiar i Noregs Mållag. Ho leidde arbeidet med den nye rettskrivingsnorma for nynorsk som blei teken i bruk i 2012.
Grete Riise
Faktaboks
Grete Riise
- Fødd
- 9. mai 1947, Hareid, Møre og Romsdal
Bakgrunn
Grete Riise er fødd i Hareid kommune i Møre og Romsdal. Ho var elev ved Eidsvoll landsgymnas i 1964–1967 og blei cand.mag. ved Universitetet i Bergen i 1974 med faga sosiologi, historie og nordisk.
Riise var lærar i Hammerfest i 1976–1980 og konsulent hos skuledirektøren i Finnmark i 1980–1986. Ho arbeidde som informasjonskoordinator for hiv-/aidsarbeidet i Bergen kommune og Hordaland fylkeskommune i 1987–1990, rådgivar hos fylkeslegen i Hordaland i 1990–1998 og som seniorrådgivar hjå Fylkesmannen i Hordaland i 2001–2017.
Språkarbeidet
Rettskrivingsnorma
I 2010–2011 var Riise leiar for rettskrivingsnemnda for nynorsk. I arbeidet med den nye rettskrivingsnorma var målet å lage ei tydeleg, enkel og stram norm, utan sideformer. Meininga var at norma skulle vere stabil over tid, slik at det ikkje blei nødvendig med endringar så ofte. Riise meiner at den nye rettskrivingsnorma for nynorsk står trygt i framtida.
Målrørsla
Riise har vore aktiv og sentral i målrørsla i fleire tiår. Som student på byrjinga av 1970-åra var ho aktiv som styrerepresentant i Norsk Målungdom og som NMU-representant i styret for Noregs Mållag 1974–1976. Ho har hatt ulike roller i Noregs Mållag, mellom anna som nestleiar i styret, dagleg leiar i 1998–2001 og leiar av valnemnda på byrjinga av 2000-talet.
Ho har vore medlem i styret til Det Norske Samlaget, leiar av Målpolitisk råd i Det Norske Teatret og medlem i styret for Dei nynorske festspela (1998–1999). Ho var rådsordførar (2001–2009) og styremedlem (2010–2014) og nestleiar (2014–2018) i styret for Nynorsk kultursentrum, og styremedlem (2012–2014) og nestleiar (2014–2016) i styret for Allkunne AS.
Les meir i Store norske leksikon
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.