Palestinakomiteen i Noreg

Hovedmålet har like sidan starten i 1969 vore å påverka norsk opinion og norske styresmakter til å gå inn for at palestinske flyktningar kan venda tilbake til området dei måtte forlata i 1948, då staten Israel vart oppretta etter FN-vedtak. I praksis vil det i så fall bety at det ikkje er plass til staten Israel, slik den er organisert i dag.

Palestinakomiteen har heile tida gått inn for norsk boikott av israelske varer og tenester. Det har og lenge vore eit krav frå komiteen at Noreg bør bryta dei diplomatiske banda til Israel. Palestinakomiteen omtalar Netanyahu-regjeringa (i 2023) som «ei fascistregjering».

Like sidan 1976 har Palestinakomiteen prioritert helsearbeid blant palestinarane, både i flyktningleirane i Beirut i Libanon og i Gaza og på Vestbreidda. Norske helseteam av lækjarar og sjukepleiarar har frå tid til annan ytt stor innsats, også under direkte krigshandlingar.

Palestinakomiteen har like frå starten meint at PLO, den palestinske frigjeringsorganisasjonen, er best eigna til å representera palestinarane. Komiteen vil likevel ikkje stå fram som noko talerøyr for PLO. Palestinakomiteen har og vore nøye med å presisera at den er kritisk til mykje av det Hamas står for og driv med. Terroråtaket mot Israel i oktober 2023, som utløyste krigen på Gazastripa, vart såleis straks sterkt kritisert av Palestinakomiteen. Line Khateeb nemnde i ordskifta like etterpå at komiteen framfor alt fordømer alle åtak på sivile.

I det offentlege ordskiftet er Palestinakomiteen og Med Israel for fred rekna som motpolar. Medan Palestinakomiteen har mest støtte på venstresida, har Med Israel for fred tilsvarande mest støtte på borgarleg side.

Palestinakomiteen gir ut medlemsbladet Fritt Palestina.

• Palestina
• Palestinas historie
• Palestinas historie etter 1948
• Med Israel for fred

• Palestinakomiteen