Aasentunet i Ørsta kommune er teikna av Sverre Fehn.

.
Lisens: Avgrensa gjenbruk

Aasentunet, i Ørsta er eit nasjonalt dokumentasjons- og opplevingssenter for nynorsk skriftkultur. Aasentunet er det eldste personmuseet i Noreg og det språkmuseet i verda med lengst historie. Museet inneheld arven etter Ivar Aasen.

Faktaboks

Også kjend som

Tidlegare namn: Ivar Aasen-tunet

Arkitekt
Sverre Fehn
År
2000

Aasentunet er ei avdeling i Nynorsk kultursentrum.

Etablering

Aasentunet vart opna av statsråd Ellen Horn 22. juni 2000. Bygget er teikna av arkitekt Sverre Fehn og reist på Ivar Aasen (1813–1896) sin fødestad, garden Åsen i Hovdebygda i Ørsta. Bygget er oppført i kvit armert betong og fekk tildelt Betongtavla for framifrå byggjekunst i betong i 2000 og A.C. Houens Fonds diplom for framifrå arkitektur i 2008.

Innhald

Museet inneheld arven etter Ivar Aasen. Denne samlinga av bøker og gjenstandar utgjer hovudutstillinga i senteret og er utforma i samarbeid mellom arkitekten og utstillingsprodusenten. I tillegg har senteret utstillingar som fortel om utviklinga av nynorsken og utstillingar om språk og kultur verda rundt, tilpassa både barn og vaksne.

Senteret husar bibliotek og arkiv med skjønn- og faglitteratur på og om nynorsk, og fleire aviser og tidsskrift. Biblioteket er ope for publikum.

Historikk

Ivar Aasen-tunet har røter attende til 1898, då familien opna det første Ivar Aasen-museet i eit trehus som vart flytta til garden. I 1946 tok museet i bruk eit nybygg i stein, og drifta vart etter kvart overteken av Sunnmøre Museum. I 2000 vart museet ein del av det nye dokumentasjons- og opplevingssenteret.

Steinhuset frå 1946, som i nyare tid blitt brukt som galleri, husar i dag kontor. Uteamfiet har vore samlingsplass for ulike arrangement i over hundre år, og senteret står i dag bak eit breitt og variert kulturprogram året rundt og festivalen Festspela i juni kvart år.

Les mer i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg