Christian Sandlie Sørum

Faktaboks

Christian Sandlie Sørum
født:
3. desember 1995
Sørum og Mol i Sveits sommeren 2018, noen dager før EM. Duoen vant både EM-gull og verdensseriefinalen i 2018. Mol til venstre, Sørum til høyre.

Christian Sandlie Sørum er ein norsk volleyballspelar frå Lørenskog i Akershus. Han utgjer saman med lagkamerat Anders Mol det mestvinnande norske laget i verdsserien i sandvolleyball. Duoen vann verdsseriefinalen i 2018 og tok EM-gull både i 2018 og 2019.

Karriere

Christian Sørum spelte som gutunge også fotball på heimstaden Rælingen, men han valde som 13-åring å satse på sandvolleyball. Han hadde fleire ulike lagkameratar før han og Anders Mol fann kvarandre i 2016.

Sørum tok gull i junior-EM saman med Runar Sannarnes i 2014, før det vart eit nytt gull i junior-EM med Mol som makker i 2016.

Allereie same året kom Sørum og Mol til kvartfinalen i Major-turneringa i Klagenfurt. I 2017 kom duoen på niandeplass i Major-turneringane i Gstaad og Poreč.

I 2018 fekk Sørum og Mol det store gjennombrotet i verdseliten. I juli gjekk dei først til topps i femstjernersturneringa i Gstaad, før dei veka etter vann EM i Nederland. Her gjekk dei gjennom meisterskapen utan å tape ein einaste kamp. I finalen slo dei Latvia 2–0. Det var det første norske EM-gullet i sandvolleyball sidan 1997.

I august vann dei nok ei prestisjefylt turnering, då dei gjekk til topps i masterturneringa i Wien. Dei vart også rangerte som det beste laget i verda på verdsrankingen.

Seinare same månaden vann dei si fjerde strake turnering og sigra i verdsseriefinalen i Hamburg. Nordmennene vann 2–0 over Polen i finalen. Sørum vart etter sesongen kåra til årets forsvarsspelar av verdas internasjonale volleyballforbund.

I 2019 deltok Sørum og Mol for første gong i VM. Duoen tok bronsemedalje i debuten etter å ha slege amerikanske Bourne/Crabb 21-15 og 15-10 i bronsefinalen. Seinare tok dei EM-gull for andre året på rad. Dei passerte og Jan Kvalheim og Bjørn Maaseide som mestvinnande norske par i verdsserien, då dei tok sin åttande triumf med siger i Gstaad. Sørum vart i desember 2019 kåra til den beste forsvarsspelaren i verda for andre året på rad.

Sørum og Mol er ein del av landslagssatsinga til Beachvolley Vikings, som også består av Mathias Berntsen og Hendrik Mol. Trenar for satsingsgruppa er tidlegare landslagsspelar og -trenar Kåre Mol.

Merittar

  • To EM-gull for juniorar
  • Fleire sigrar i verdsserien
  • Europameister 2018 og 2019
  • Vinnar av verdsseriefinalen 2018
  • Bronse i VM 2019
  • Årets lag på Idrettsgallaen 2020

Sigrar i verdsserien, stad og dato

  • Gstaad, 14. juli 2018
  • Wien, 5. august 2018
  • Hamburg, 18. august 2018
  • Las Vegas, 21. oktober 2018
  • Itapema, 19. mai 2019
  • Jinjiang, 26. mai 2019
  • Ostrava, 2. juni 2019
  • Gstaad, 13. juli 2019
  • Tokyo, 28. juli 2019
  • Wien, 4. august 2019

Les meir i Store norske leksikon

Eksterne lenker

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg