navaho (språk)

Navaho (eller navajo) høyrer til språkfamilien eyak-athabaskisk. Eyak er eit nyleg utdøydd språk i Alaska. Athabaskisk, med fleire språk enn nokon annan nordamerikansk språkfamilie, har tre greiner: nord-athabaskisk, stillehavskyst-athabaskisk og sør-athabaskisk. Den siste greina, som òg blir kalla apasjeansk, har undergruppene navaho og apasje.

Det opphavlege heimlandet til eyak-athabaskisk var truleg indre Aust-Alaska. Ur-eyak og ur-athabaskisk skilde lag 1500 før vår tidsrekning, og ur-athabaskisk splitta seg i greiner etter 500 fvt. Dei neste tusen åra spreidde athabaskisk seg over eit stort område i Alaska og Nordvest-Canada, frå Stillehavet til Hudsonbukta. Den apasjeanske greina kom til Sørvest-USA kring år 1500.

I navaho-setninga kjem verbet sist. Rekkjefølgja av subjekt og objekt er styrt av «naturens rangstige», også kalla animatgrads-skalaen: di høgare på skalaen, di lenger framme i setninga:

vaksne menneske/lyn → ungar/store dyr → middels store dyr → små dyr → insekt → naturkrefter → døde ting/plantar → abstrakte omgrep

I setninga nedanfor står at'ééd 'jente' framfor tsídii 'fugl', sidan ungar er meir animate enn små dyr.

• objekt subjekt verb
• At'ééd tsídii bishtąsh. 'Fuglen hakka jenta.'
• 'jente' 'fugl' 'hakka'

At tsídii 'fugl' er subjekt, ser vi av verbprefikset bi-, som fortel at andreleddet er subjekt. Sjå no på denne setninga:

• subjekt objekt verb
• Ashkii at'ééd yiníł'į́. 'Guten ser på jenta.'
• 'gut' 'jente' 'ser på'

Ashkii 'gut' og at'ééd 'jente', begge ungar, er like animate. Verbprefikset yi- fortel at førsteleddet er subjekt. For å seie 'Guten ser på jenta' kan vi òg snu om på ledda og nytte verbprefikset bi-:

• objekt subjekt verb
• At'ééd ashkii biníł'į́. 'Guten ser på jenta.'
• 'jente' 'gut' 'ser på'

Vi får ei ugrammatisk setning (merkt med *) dersom vi seier 'Fuglen hakka jenta', med subjekt framfor objekt og med verbprefikset yi-, sidan subjektet er mindre animat:

• subjekt objekt verb
• *Tsídii at'ééd yishtąsh. 'Fuglen hakka jenta.'
• 'fugl' 'jente' 'hakka'

Det tradisjonelle navaho-huset heiter hooghan, og ordet er kjent internasjonalt – jamfør engelsk, tysk og fransk hogan. Ein hogan liknar wigwamen til dei algonkinske folka.

• navaho (folkegruppe)
• amerikanske urfolkspråk