Martin Luthers lille katekisme, 1835
Av /Hadeland Folkemuseum.
Martin Luther

Katekisme er ei kort framstilling av innhaldet i den kristne trua, berekna for barneundervisninga. I oldtida var katekisme nemning på den munnlege undervisninga av dåpkandidatar forut for dåphandlinga, særleg hos Augustin. Herfrå gjekk det over til å karakterisere den elementære undervisninga i kristendommen for døypte barn. I mellomalderen omfatta denne vanlegvis trusvedkjenninga, Fadervår og dei ti boda. Martin Luther var den første som brukte ordet katekisme som boktittel. Etter han blei bruk av katekisme om den kristelege barnelærdommen vanleg.

Faktaboks

Uttale
katekˈisme
Etymologi
til katekese

Luthers vesle katekisme

Luthers vesle katekisme kom ut i 1529 og har vore grunnlag for den kristne undervisninga overalt i dei lutherske kyrkjene. Luthers store katekisme (også 1529) er ei handbok for lærarar og prestar. Frå den pietistiske tida har katekismeforklaringar med spørsmål og svar blitt brukt som lærebok i kristendomsundervisninga. I Danmark-Noreg blei Erik Pontoppidans Sandhed til Gudfrygtighed (1737) innført som lærebok ved konfirmasjonen og i allmugeskulen. I Noreg blei denne boka brukt til langt opp på 1800-talet. Seinare fekk Thorvald Klaveness' Forklaring (1892) stor innverknad.

Den offisielle katekismen til den katolske kyrkja

Catechismus Romanus (1566) blei skriven for prestar. Det er også gitt ut mange folkelege katolske katekismar. I 1967 gav ei gruppe nederlandske katolske teologar, med godkjenning av dei nederlandske biskopane, ut ei handbok i den kristne trua prega av moderne, progressiv teologi, og boka blei kalla Katekisme. Boka førte til stor diskusjon, og ho blei omsett til fleire språk. Ein ny offisiell katolsk katekisme blei gitt ut av Vatikanet i 1992, Catechismus Ecclesiae Catholicae (Katekismen til den katolske kyrkja, 1994).

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg