Faktaboks

Christl Kvam
Fødd
2. juli 1962, Øvre Årdal, Vestland
Christl Kvam.
Christl Kvam.
Av /NTB.

Christl Kvam er sjukepleiar, siviløkonom, tidlegare leiar av Akademikarane og regiondirektør i NHO Innlandet. Ho blei utnemnd til fylkesmann i Oppland i 2015 og statssekretær for arbeids- og sosialminister Anniken Hauglie i 2016.

Bakgrunn

Christl Kvam er fødd i Øvre Årdal i Årdal i Sogn og Fjordane (no Vestland). Ho tok vidaregåande skule i 1979–1982, sjukepleiarutdanning ved Ullevål sykepleierhøgskole i Oslo (no Høgskolen i Oslo og Akershus) i 1983–1986 og siviløkonomstudiet ved Norges Handelshøyskole i Bergen i 1987–1991. I 2001 tok ho dessutan styrekandidatprogrammet ved BI og sjefskurs ved Forsvarets høgskole i Oslo.

Karrieren

I 1986 arbeidde Kvam som sjukepleiar ved Kongsberg sjukehus, hadde deltidsstilling som sjukepleiar ved Bergen Røde Kors sykehjem i 1987–1991 og var konsulent i samferdselsseksjonen og seksjonsleiar i merkantil seksjon i Oppland fylkeskommune (no Innlandet) på Lillehammer i 1992–1997. Frå 1997 til 2000 var ho personalsjef ved Gudbrandsdalens Uldvarefabrik AS på Lillehammer og prosjektmeklar ved Lillehammer Kunnskapspark i 2000–2003. I perioden 2002–2008 var ho leiar i fagforeininga Akademikarane og i 2008–2015 regiondirektør for NHO i Hedmark/Oppland. I perioden 2015 til 2018 var ho utnemnd til fylkesmann (no statsforvaltar) i Oppland.

I perioden 2016 til 2019 fekk ho permisjon frå fylkesmannsembetet for å bli statssekretær for arbeids- og sosialminister Anniken Hauglie. Assisterande fylkesmann Sigurd Tremoen vikarierte som fylkesmann medan ho hadde permisjon. Kvam vart deretter tilsett som kommunedirektør i Hamar i 2019.

Tillitsverv

Christl Kvam har hatt ei rekkje tillitsverv, mellom anna har ho vore styremedlem av DølaJazz i 1991–2001, nestleiar i Akademikarane i 1997–2002, styremedlem av Business Analyze i 2002–2007, nestleiar i styret i Olympiaparken AS i 2003–2009 og medlem av Litteraturfestivalens råd i 2006–2008. Ho var styreleiar i Lillehammer turist AS i 2005–2012, styremedlem i Gudbrandsdølen Dagningen i 2009–2013, medlem av styret og seinare styreleiar i Revmatismesykehuset i 2009–2015 og nestleiar i Nordisk institutt for studiar av innovasjon, forsking og utdanning (NIFU) frå 2014.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg