Då dei siste store landsdelsavisene la om til tabloidformat 16. september 2006, blei Møre Nytt den einaste avisa i landet som kom ut i fullformat. 24. november 2007 la også denne avisa om til tabloidformat.
Møre-Nytt har kome ut i Ørsta sidan 1935. Det var Alf Bergmann og Øivind Bergmann som starta avisa. Møre-Nytt har seinare vore eigd av familien, frå 1977 som aksjeselskap. Etter eit oppkjøp i 2007 har Sunnmørsposten 65 prosent av aksjane. Resten eig redaktør Erik Bergmann, som har arbeidd i avisa i godt over ein mannsalder. Han er son til Alf Bergmann.
Ved krigsstart var det to aviser i Ørsta, men Ørsta Avis gjekk inn i januar 1941. Med nokre korte avbrot heldt Møre-Nytt fram krigen ut. Ein patriotisk diktaksjon våren 1941 var ei modig handling, men etter kvart likna framsida meir på ei hovudstadsavis enn eit bygdeblad. Propaganda og nazistisk stoff kom inn i spaltene.
I 1946 kom Møre-Nytt i eige hus med gode vilkår for avisa og eige trykkeri. I starten kom avisa ut fredagane med fire sider, og med éi krone som bladpengar i kvartalet. Avisdagane blei seinare tysdagar og fredagar. I 1980 blei noverande avishus teke i bruk. Då gjekk avisa også over til offsettrykk, og åtte sider i fullformat kunne trykkast samstundes. Opplaget var kring 2000 i 1970 og passerte 5000 kring 1990. Møre-Nytt har 92 prosent dekning i Ørsta kommune. Mange frå nabokommunen Volda abonnerer på Møre- Nytt, medan svært få ørstingar finn Volda-avisa Møre interessant.
Møre-Nytt sin styrke er god kontakt med offentlege og private verksemder, lag og organisasjonar. Eit nettverk av meldarar frå heile kommunen er ein viktig ressurs. Avisa har blitt heidra med kommunen sin kulturpris (1991), kåra til beste lokalavis på Sunnmøre (1991) og beste idrettsavis i Møre og Romsdal (2002), og ho har fått Ørsta Mållag sin nynorskpris (2006).
Møre-Nytt har fått tabloidformat, og sidetalet varierer mellom 32, 40 og 48 sider, no også i fargar. Møre-Nytt knyter heimstadband som det er vanskeleg å løyse opp, sjølv for utflytte.
Møre-Nytt har alltid vore nynorskavis og utan politisk binding. I 2008 kom avisa ut tysdagar, torsdagar og laurdagar med eit opplag på vel 5500, trykt hos Edda Trykk Nordvest i Ålesund.
Store norske leksikon
Kommentarer
Kommentaren din publiseres her. Fagansvarlig eller redaktør svarer når de kan.
Du må være logget inn for å kommentere.