Vigleik Leira var språkvitar. Han var den fremste allmennlingvisten i sekretariatet til Norsk språkråd.
Vigleik Leira
Faktaboks
- Fødd
- 22. november 1931, Oslo
- Død
- 27. mai 2010, Oslo
Bakgrunn
Vigleik Leira var fødd i Oslo. Han voks opp i Stavanger i Rogaland, tok examen artium i 1950 og vart cand.philol. i 1968 ved Universitetet i Oslo med russisk hovudfag og fransk og engelsk. Seinare tok han også norsk. Før han byrja å studere språk, hadde han ymse arbeid. Mellom anna var han bryggjearbeidar i Oslo.
Språkvitskap
Frå 1969 var han forskingsstipendiat ved Institutt for lingvistikk ved Universitetet i Oslo og seinare hjelpelærar ved Institutt for nordisk språk og litteratur. Frå 1975 til 2001 arbeidde han i Norsk språkråd, frå 1978 som fast tilsett. Han var den fremste allmennlingvisten i sekretariatet.
For Norsk språkråd redigerte Leira i 1982 boka Nyord i norsk 1945–1975. Han gav elles ut Innføring i lingvistisk semantikk (1971), Termar i grammatisk analyse (1991), Ordlaging og ordelement i norsk (1992) og Geografiske navn i flere språk (2006). Han skreiv òg ei rad vitskaplege og populærvitskaplege artiklar. Posthumt kom den store samlinga Grammatiker og bryggearbeider (2011). Han skreiv både radikalt bokmål og nynorsk. Teoretisk hadde han si forankring i strukturalismen.
Les meir i Store norske leksikon
Litteratur
- Vigleik Leira: Grammatiker og bryggearbeider. Oslo 2011
- Einar Lundeby ofl. (red.): Fornying og tradisjon. Språkvern og språkrøkt 1972–1988. Oslo 1987
- Dag F. Simonsen og Marit Hovdenak: «Vigleik Leira til minne». Språklig samling nr. 2/2010
- Språknytt, 1977–2010
- Årsmeldingar frå Norsk språkråd
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.