Tysvær Bygdeblad

Eit prøvenummer var ferdig i desember 1975. Styret redigerte dei første utgåvene fram til Lars Olav Tunbø vart tilsett som redaktør i mars 1976. Dei første åra kom bladet berre ut kvar fjortande dag. Frå 1981 kom bladet ut kvar veke for å gi lesarane fleire og ferskare nyheiter.

Tysvær kommune fekk sine nåverande grenser i 1965 då den opphavlege Tysvær kommune vart slått saman med Nedstrand og deler av Avaldsnes og Skjold. Desse områdene hadde ulike tradisjonar, og dei mangla eit naturleg sentrum som kunne binde bygdene saman. Det nåverande kommunesenteret er Aksdal som opphavleg var eit vegkryss nesten utan busetnad.

Ved kommunesamanslåinga var Tysvær ein landbrukskommune med litt over 5000 innbyggjarar. Folketalet steig etter kvart monaleg. Veksten skjedde særleg i den vestre delen av kommunen, nær grensa mot Haugesund. Mange av dei nye innbyggjarane rekna seg meir som haugesundarar enn som tysværbuar.

Nærleiken til Haugesund er den viktigaste årsaka til at Tysvær Bygdeblad ikkje har vakse i takt med kommunen, men hatt eit stabilt opplag på drygt 2000. Avisa har heile tida hatt høgast husstandsdekning i Nedstrand i aust, der folketalet går tilbake, medan ho har problem med å nå innflyttarane i den vestre delen.