Karl Akre

Karl Edvard Pedersen Akre var fødd i Alta i noverande Troms og Finnmark og døydde i Vadsø i Finnmarks amt (no Troms og Finnmark). Før han tok lærareksamen ved Tromsø seminar i 1862, hadde han i 1859 vore lærar i kvensk-norsk ved småskulen i Alta. I 1862 var han lærar og kyrkjesongar i Kjelvik. Frå 1865 var han tilsett som andrelærar ved folkeskulen i Vadsø. Han vart førstelærar i 1884 og skulestyrar i 1911.

I ei rekkje år var Akre oppsynsmann i Hamningberg i Båtsfjord under vårfisket, og han fungerte òg som tingtolk i samisk og kvensk. Frå 1869 til 1910 var han medlem av bystyret. Han var formann i skulestyret, forlikskommissær og medlem av fiskerikommisjonen i 1891. I 1886–1888 var han stortingsrepresentant for Venstre. Då Den Norske Godtemplarorden vart skipa 24. juni 1888, var Akre møteleiar.

Akre var med på skipinga av Finmarkens Amtstidende i 1871. Han var oppteken av Finnmark si historie og skreiv fleire artiklar om det gamle Vadsø. På dansk-norsk praktiserte han ei rettskriving som låg føre si tid. Rettskrivinga låg nær 1907-normalen.

I juli 1875 gav han saman med Ananias J. Brune ut landsmålsbladet Finnmarkingen, men bladet kom berre med to nummer. Det var det nordlegaste bladtiltaket på landsmål.

• norsk presses historie
• Finnmarkingen
• kvensk
• landsmål

• Anton Aure: «Dei nynorske bladi. Ei stutt soge-yversyn», Norskt Bladmannalag gjenom 10 aar – 1913–1923. Bjørgvin 1923
• Johan Beronka: Vadsø bys historie. Med spredte bidrag til Varangers historie. Vadsø 1933
• Per Håland: «Den nynorske pressa», Målreising i 75 år. Noregs Mållag 1906–1981. Oslo 1981
• Christian Wiik: Tromsø-seminarister. 1829–1879. Oslo 1948