Etnolekt er ein språkvariant som er karakteristisk for språkbrukarar frå ei bestemt etnisk gruppe. Nemninga etnolekt oppstod først som namn på språket til ungdomsgrupper i kulturelt og språkleg heterogene miljø i storbyar og forstader i ulike delar av Europa. I nemninga etnolekt ligg det at ungdomane snakkar majoritetsspråket (til dømes norsk) på ein «utanlandsk» måte.
Også i Noreg finn me døme på bruk av etnolektar, og då særleg i innvandrarmiljøa på austkanten av Oslo. Den «utanlandske» og multietniske måten å snakka på er som oftast ikkje eit uttrykk for manglande kompetanse i majoritetsspråket norsk, men eit medvite gruppespråk blant dei som brukar det.
Når fleire innvandrargrupper møtest med kvar sitt språk og kvar sin kulturbakgrunn, kan det oppstå ein språkvariant som ein kallar ein multietnolekt. I denne nemninga ligg det at ein i visse innvandrarmiljø kan høyra fleire etnolektar, der kvar etnolekt byggjer på heimespråket til ulike innvandrargrupper.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.