Taizong av Tang var kinesisk keisar i perioden 626–649. Ved hjelp av ein sterk hær skapte han ro og orden i landet, innførte ei effektiv forvaltning, fekk utarbeidd dei grunnleggjande «lovene til Tang-dynastiet» og oppretta eit universitet i Xi'an med internat for cirka 3000 studentar.
Li Shimin, som han opprinneleg heitte, deltok aktivt i farens kupp mot Sui-dynastiet og blir dermed rekna som medgrunnleggjar av Tang-dynastiet. Seinare vart han den andre keisaren i Tang-dynastiet. Han er tradisjonelt rekna som ein eksemplarisk keisar, ansvarleg for politiske konsolideringar og territoriale utvidingar utan å ty til overdriven autokrati slik som forløparen Sui.
Under Taizongs styre sette Tang i gang med store territoriale erobringar. Særleg viktig var sigeren over det aust-tyrkiske khanatet i nord, og erobringa av oase-bystatane i Tarim-bassenget (i dagens Xinjiang) i vest. Dei la grunnlaget for vidare erobringar inn i Sentral-Asia og Tang-Kinas protektoratsystem. Mindre vellukka var felttoga mot Korea, som òg byrja under Taizong. Taizong deltok sjølv i det mislukka felttoget mot det koreanske kongeriket Koguryo i 644. Koguryo vart sidan nedkjempa og Nord-Korea innlemma som protektorat, men i 676 vart Tang og Kina drivne ut av Korea for godt.
Blant Taizongs konkubiner var Wu Zetian, som sidan vart keisar.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.