Faktaboks

Stephen Hawking
Uttale
hˈå:kiŋ
Fødd
8. januar 1942, Oxford, England
Død
14. mars 2018, Cambridge, England
Stephen Hawking, Cambridge
Stephen Hawking var ein britisk fysikar som heldt til på Cambridge University i Storbritannia. Han var stadig på reise jorda rundt som ein svært populær føredragshaldar.
Stephen Hawking

Stephen Hawking

Av /NTB Scanpix ※.
Vektlaus Stephen Hawking
Stephen Hawking forska mellom anna på gravitasjon. Her er han sjølv vektlaus i ein spesialdesigna Boeing 727, i samband 65-årsdagen sin i 2007.

Stephen William Hawking var ein britisk teoretisk fysikar, astrofysikar og matematikar, som var professor i matematikk ved Cambridge University frå 1980. Han er mest kjend for å føreseie at svarte hol sender ut stråling – som har fått namnet Hawking-stråling.

21 år gamal fekk Hawking diagnosen amyotrofisk lateralsklerose (ALS), ein ulækjeleg (uhelbredelig) og progressiv nevromotorisk sjukdom. Likevel fullførte han studiane, og med bistand frå kona Jane Wilde Hawking (fødd 1944), medarbeidarar, studentar og tekniske hjelpemiddel klarte han å formidle verdifulle idear og forme ut nye teoriar av stor betydning.

Forsking

Singularitetar

Hawkings tidlegaste arbeid var innan generell relativitetsteori og handla om singularitetar. Han bygde på arbeidet til matematikaren Roger Penrose og viste at universet under ganske generelle vilkår må ha starta som ein singularitet.

Hawking-stråling

På 1970-talet arbeidde han med såkalla semi-klassisk gravitasjonsteori, ei tilnærming til kvantegravitasjon der tid og rom blir beskrive klassisk, medan partiklane og felta blir behandla kvantemekanisk. Ved å behandle svarte hol på denne måten viste han i 1974 at svarte hol stråler (les meir under Hawking-stråling).

Starten av universet

På midten av 1980-talet utvikla han i samarbeid med James Hartle ein kvantemekanisk modell for starten av universet. I denne modellen er universet endeleg i både rom og tid, men tida har likevel inga byrjing. Denne modellen danna utgangspunktet for det meste av forskinga til Hawkings fram til han gjekk bort.

Bøker

Hawking har skrive ei rekkje populærvitskaplege bøker, mellom anna desse:

  • The Very Early Universe: Proceedings of the Nuffield Workshop, Cambridge (1983, saman med Gary William Gibbons og Stephen Siklos )
  • A Brief History of Time: From the Big Bang to Black Holes (1988, norsk omsetjing: Univers uten grenser, 1988)
  • Black Holes and Baby Universes and Other Essays (1993, norsk omsetjing: Svarte hull, babyunivers og andre essays, 1993)
  • The Nature of Space and Time (1996, saman med Roger Penrose)
  • The Universe in a Nutshell (2001, norsk omsetjing: Universet i et nøtteskall)
  • A Briefer History of Time: The Science Classic Made More Accessible (2008, saman med Leonard Mlodinow).

Hawkings memoarar, My Brief History, kom ut i 2013.

Film og privatliv

Filmen The Theory of Everything (2014) av regissør James Marsh fortel historia om livet til ekteparet Stephen og Jane Hawking. Filmen vann mellom anna Oscar for beste mannlege hovudrolle (Eddie Redmayne) og BAFTA-prisen for beste britiske film.

Stephen og Jane Hawking (fødd Wilde) gifta seg i 1965, vart separerte i 1990 og skilde seg i 1995. Paret fekk tre barn saman. Frå 1995 til 2006 var Stephen Hawking gift med Elaine Mason (fødd 1951).

Utmerkingar

Hawking fekk mange prisar og utmerkingar, mellom anna Albert Einstein-medaljen i 1979, Royal Astronomical Societys gullmedalje i 1985, Copleymedaljen i 2006 og presidentens fridomsmedalje frå USA i 2009.

Les meir i Store norske leksikon

Eksterne lenker

Kommentarar (2)

skreiv Arne S. Dolven

Teksten bør nå oppdateres. Vennlig hilsen Arne S. Dolven

skreiv Kaare Aksnes

Jeg har nå lagt til en ny publikasjon av Hawking.

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg