Magnar Mikkelsen

Faktaboks

Magnar Mikkelsen
Født
5. april 1938, Lebesby, Troms og Finnmark

Artikkelstart

Magnar Mikkelsen var ein norsk journalist og forfattar. Han er ein allsidig og engasjert journalist og forfattar som har vore oppteken av å formidle utviklinga i Finnmark i etterkrigstida.

Magnar Mikkelsen er fødd i Veidnes i Lebesby kommune i Troms og Finnmark. Han tok examen artium i 1959 ved Volda landsgymnas, og i perioden 1960–1971 arbeidde han først som vikar i Sunnmørsposten og deretter som journalist i Bergens Arbeiderblad, Finnmark Dagblad, Lofotposten og ved NRKs distriktskontor i Finnmark.

Mikkelsen debuterte som forfattar med romanen Ved det siste fjell i 1966. Her skildrar han opplevingane på slutten av krigen, då Finnmark vart brent og evakuert. I 1969 gav han ut novellesamlinga Fuglen og evigheten, med forteljingar frå nordnorsk miljø. I 1970-åra kom viktige debattbøker: Masi, Norge (1972), Svart hav (1974) og særleg Hundre år under pisken. Fortellinger fra Finnmark (1978). Den sistnemnde boka tematiserer den systematiske undertrykkinga av den norske og den samiske befolkninga. I 1980 kom Elva skal leve, eit innlegg i kampen mot utbygginga av Alta-vassdraget. Men Mikkelsen er òg internasjonalt orientert, som i Transit. Fra en reise som aldri tok slutt (1986) og En soldat som kom naken hjem (1989), der temaet er henta frå krigen i Afghanistan.

Som forfattar har Mikkelsen ønskt å formidle problem og utfordringar i den nordlegaste landsdelen til ei større norsk allmente. Fleire av dei dokumentarisk orienterte bøkene hans har skapt debatt. Ein styrke i forfattarskapen hans er dei konkrete skildringane av menneskelivet på Finnmarkskysten.

Mikkelsen var blant initiativtakarane då Nordnorsk Forfatterlag vart skipa i 1972, og han spela i fleire år ei sentral rolle i dette miljøet. Han har skrive innanfor fleire litterære sjangrar: romanar, dikt, noveller, essays og skodespel. Han har òg arbeidd med film. Kortfilmen Sjarken og støa kom i 2003, og i 2009 og 2010 laga han dokumentarfilmane Vindenes Hus og Meditasjoner. Alle desse filmane er bygde på opptak frå heimbygda gjennom ti år. Han driv Albatross Forlag, der han saman med Kari Pålsrud mellom anna har gitt ut boka Kautokeino-dokumentene (1997), som inneheld 177 arkivdokument frå rettssaka i samband med læstadianaropprøret i Kautokeino i 1850-åra.

Magnar Mikkelsen fekk tildelt Språklig samlings litteraturpris i 1997 og Lebesby kommunes kulturpris i 2010.

Les meir i Store norske leksikon

Eksterne lenker

Litteratur

  • Øystein Rottem: Norges litteraturhistorie, bd. 2: Inn i medietidsalderen 1965–80. Oslo 1997
  • Finn Stenstad: Fram fra de hundrede mile. Nordnorsk litteratur fra 1945 til 1992. Oslo 1992

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg