Kirsti Koch Christensen

Den akademiske utdanninga si har Christensen fra Universitetet i Oslo der ho blei mag. art. i allmenn språkvitskap i 1978 på ei avhandling med tittelen A Study of Japanese Causative Constructions. At ho kom til å spesialisere seg i japansk har samanheng med at ho saman med familien sin budde i Japan i fleire år, og studerte japansk i Kobe mellom 1971 og 1973. Dette stimulerte interessa hennar for lingvistikk. Vel heime i Oslo igjen tok ho grunnfag i japansk i 1974 og i allmenn språkvitskap i 1975. Ho var førsteamanuensis i lingvistikk ved Universitetet i Bergen fra 1988 til 1990 og ved Universitetet i Oslo fra 1990 til 1991 da ho blei professor ved UiB.

Som forskar har Christensen i hovudsak konsentrert seg om teoretisk syntaks med data frå japansk og skandinaviske språk. Ho har deltatt i fleire større forskingsprosjekt. Undervisningserfaring har ho frå ulike institusjonar og i ulike emne: allmenn lingvistikk, syntaks, morfologi, semantikk, psykolingvistikk, norsk grammatikk, stilistikk og språkbruksanalyse, japansk språk (grammatikk og tekstanalyse) og japanske samfunnsforhold. Ho har òg engasjert seg i prosessorientert skriving og skrivepedagogkk.

Ein vald universitetsrektor er naturleg nok meir enn gjennomsnittleg interessert i universitetspolitikk. Lenge før ho blei rektor i Bergen hadde Christensen såleis ymse fagpolitiske og administrative verv på institutt-, fakultets- og styrenivå, både i Oslo og i Bergen. Ho var dessutan prorektor i Bergen før ho blei vald til rektor.

Rektortida hennar var prega av fleire store nasjonale reformer i høgare utdanning. Med slike reformer og den første felles lova for universitets- og høgskolesektoren frå 1995 som bakgrunn blei universitetsutviklinga sterkt prega av ein vekselverknad mellom nasjonale aktørar og aktørar på institusjonsnivå og i Christensens rektortid også på europeisk nivå. I dette samspelet hadde Christensen ein tydeleg plass. Ho har vidare vore engasjert i ymse samarbeidsorgan på nordisk og europeisk nivå, samstundes som ho også har lagt ned ein innsats i Noregs forskingsråd (også i det tidlegare NAVF), i Norsk språkråd mellom 1992 og 1999, og ho har sete i styret for det daverande Statoil i ein periode fra 1999.

Christensen er Ridder av 1. klasse av Den kongelege norske St. Olavs Orden frå 2003. I 2006 fekk ho den japanske ordenen Den oppadstigende sols orden.

• språkvitenskap

• Andersen, Øivin, Kjersti Fløttum og Torodd KInn (red.) (2000): Menneske, språk og fellesskap. Festskrift til Kirsti Koch Christensen på 60-årsdagen 1. desember 2000. Oslo: Novus