prærie

Prærie er vidstrekte, trelause grassletter. Ordet blir særleg brukt dei fruktbare slettene i Nord-Amerika som strekkjer seg frå Nord- og Sør-Dakota til Ohio og frå Canada til nordaustlege Kansas og Missouri. Medan dei austlege slettene opphavleg var dekte av langt gras (tall-grass prairie), var dei vestlege delane, The Great Plains, dekte av kort gras (short grass plains). Præriejorda er eit kalsium- og humusrikt jordsmonn som er ei svært god dyrkingsjord. Det meste av prærien er i dag oppdyrka; i aust blir det hovudsakleg dyrka mais, i dei sentrale områda kveite.

Svært lite av den opphavlege prærien er bevart. Overgangen frå naturleg vegetasjon til monokultur har medført kraftig vinderosjon, særleg er dei vestlege prærieområda råka av dette. I 1930-åra skapte erosjonen sandstormar – «The Black Blizzards». Jordkonservering blir no sikra gjennom «dry farming», kunstig vatning og «contour plowing», der plogfòrene blir laga horisontalt for å samle opp overflatevatnet. Likevel går framleis store delar av det fruktbare jordsmonnet tapt kvart år.