Nasir al-Din al-Albani

Nasir al-Din al-Albani var ein av dei viktigaste tenkarane i moderne salafisme og leiande hadith-fortolkar. Al-Albani blir i dag rekna som ein av dei viktigaste tenkarane innan ikkje-militant salafisme, og hans hadtih-tolkingar har stor innverknad på både islamistiske og andre muslimske teologar.

Al-Albani var fødd i Albania, men etter religiøse studiar i Syria spesialiserte han seg på fortolking av hadith. Han insisterte på at dei måtte lesast ut frå teksta, utan omsyn til den tolkingstradisjonen som hadde utvikla seg seinare. Derfor meinte han at mange islamske reglar var utan verdi, sidan dei ikkje hadde grunnlag i hadithane. Nokre av reglane han protesterte mot var at moskear har ein minbar som viser retninga mot Mekka, at ein måtte gå berrføtt i moskéen og at kvinner må bruke ansiktssløret niqab.

Denne strengt teksttru tolkinga førte til konflikt med styresmaktene både i Syria og i Saudi Arabia, der han underviste i ein periode. Al-Albani heldt seg strengt borte frå politisk verksemd og kritiserte tenkinga til islamistar som Hasan al-Banna og Sayyid Qutb. Han kom til slutt attende til Syria der han døydde i 1999.