Qi

Qi er namnet på diverse mindre kinesiske statar opp gjennom historia, alle med base på Shandong-halvøya i Aust-Kina.

Den første og kanskje mest kjende av statar med namnet Qi var ein av dei sju mektigaste statane under det austre Zhou-dynastiet (771–221 fvt.), den lengste perioden med politisk splitting i kinesisk historie.

Saltproduksjon og transitt for metallhandelen gav staten eit godt økonomisk grunnlag. Staten var òg eit intellektuelt sentrum, i ei tid då Kinas store idétradisjonar voks fram, deriblant daoismen, konfusianismen og mohismen.

I åra 679–632 fvt. var kongen av Qi anerkjend som «hegemon» (bà 霸) av dei andre kinesiske kongane. I 221 fvt. vart Qi, som siste sjølvstendige kinesiske stat, erobra av Zheng, kongen av Qin. Dette markerte starten på det kinesiske keisarriket.