dreng

Dreng er ein ung gut i alderen mellom lite barn og vaksen. Ordet kan også bli brukt om ein medhjelpar, særleg på ein gard.

I norrønt var drengr ein gjæv mann, ein med dygder som ære, djervskap og vågemot. Krigarar vart ofte omtala som drengar, og det var ein heiderstittel. Dette kjem til syne i uttrykket hafa dreng i serk sér, bokstaveleg 'ha ein dreng under skjorta', som betyr å vere uredd og framfus.

Drengr kunne også bety 'ung, uetablert mann' og vart gjerne brukt om ein som tente hjå hovdingar og mektige bønder.

Etter kvart kom «dreng» til å bli brukt generelt om unge menn og generelt om menn som var i teneste hjå andre. Slik bruk av ordet byrja allereie utover i mellomalderen og har halde seg heilt til våre dagar, særleg om gardsgutar og medhjelparar i andre yrke (til dømes lensmannsdreng).

Dreng er også eit mannsnamn.

I dansk har «dreng» hatt liknande tydingar som i norsk, men blir no oftast brukt om eit gutebarn i dei første leveåra.