Norheimsund

Norheimsund er ein tettstad i Kvam kommune i Vestland. Tettstaden er ifølgje SSBs definisjon 3,9 km², og har 4566 innbyggjarar (2022).

Norheimsund er administrasjonssenter i Kvam kommune i Hardanger.

Tettstaden ligg på vestsida av Hardangerfjorden, rundt munningane av dei to elvane Steinsdalselva i vest og Øysteseelva i aust, og dessutan på halvøya mellom desse. Før 2019 var det som no blir rekna som tettstaden Norheimsund to tettstader, høvesvis Norheimsund i vest og Øystese i aust. Frå dette året er dei klassifiserte som éin tettstad med namnet Norheimsund.

Begge dei to tidlegare tettstadene har variert småindustri, verkstads-, trevare- og næringsmiddelindustri i Norheimsund og særleg trevare- og møbelindustri i Øystese. Kvam vidaregåande skule har avdelingar i begge dei to tidlegare tettstadene. Kvam bygdemuseum ligg i Øystese, likeins Ingebrigt Vik museum (skulpturmuseum). Bilethoggaren Ingebrigt Vik var herfrå. I Norheimsund ligg Hardanger Fartøyvernsenter.

Det er stor turisttrafikk og fleire hotell og overnattingsstader. Øystese kyrkje er ei langkyrkje i tre frå 1868, medan Norheimsund kyrkje er ei moderne arbeidskyrkje frå 1992. Nokre kilometer vest for Norheimsund er Steinsdalsfossen (Øvsthusfossen) i Steinsdalselvi, som er ein attraksjon.