Guðmundur Böðvarsson var ein islandsk lyrikar. Frå 1931 til 1959 var han bonde på heimgarden Kirkjuból, og 1959–1962 var han bibliotekar ved biblioteket i Hafnarfjörður.
Den tidlege lyrikken hans er prega av nyromantikk og er skriven i eit høgtidleg språk. Seinare blir dikta hans meir sosialt engasjerte, motiva meir realistiske og naturskildringane prega av ei jordnær haldning.
Han debuterte i 1936 med diktsamlinga Kyssti mig sól (Sola kyste meg), som fekk stor merksemd på Island. Blant dei viktigaste samlingane hans kan nemnast Kristallinn í hylnum (Krystallen i kulpen, 1952), Saltkorn í mold (1–2, 1962–65) og Innan hringsins (Innanfor ringen, 1969).
I dikta hans frå 1960-åra er det mange kampdikt mot militærmakt og den amerikanske militærbasen ved Keflavík.
Guðmundur Böðvarsson gav også ut brevromanen Dyr í vegginn (Dyr i veggen, 1958) og novellesamlinga Atreifur og aðrir fuglar (Atrevs og andre fuglar, 1971).
På norsk er han representert i Islandske dikt frå vårt hundreår ved Ivar Orgland.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.