Kjell Egil Olborg Bakkelund

• Verdsmeister med utstyr i 2013, 2019, 2021 og 2022
• Verdsmeister utstyrsfritt i 2017
• Europameister med utstyr i 2013, 2014, 2019 og 2022
• Europameister utstyrsfritt i 2018
• NM-gull og kongepokal i 2013, 2015, 2018, 2019 og 2022
• Gull i World Games 2022

Kjell Egil Bakkelund byrja å konkurrere i styrkeløft i 2007, og sidan har han vore å rekne med blant dei aller beste utøvarane i Noreg.

Han er opphaveleg frå Gjøvik, men har konkurrert både for Brumunddal Atletklubb, Sande Kraftsportklubb og Oslo Styrkeløftklubb.

Bakkelund debuterte på internasjonalt toppnivå i 2009, då han vart nummer seks i både junior-EM og junior-VM. Han vart verdsmeister for juniorar i 2011.

Bakkelund tok sitt første gull i senior-NM i 2012, men det var 2013 som vart det store gjennombrotsåret. Det året vann Bakkelund først EM-gull i mai, før han tok sølv under World Games i juli og avslutta året med å bli verdsmeister i Stavanger i november.

Kjell Egil Bakkelund vart i november 2014 utestengd frå det norske landslaget til og med 1. januar 2016 etter eit påstått brot på det interne regelverket i Norges styrkeløftforbund.

Etter å ha tatt nye VM-gull i 2019 og 2021, vart han i 2022 verdsmeister med utstyr for fjerde gong. Det var då ni år sidan han tok sitt første VM-gull – og også denne gongen skjedde det i Stavanger.

Bakkelund står per november 2021 med dei norske rekordane samanlagt både i 74- og 83-kilosklassen. Dei er på høvesvis 900,0 og 942,5 kilo. Han har også noregsrekordane i begge klassane i knebøy og markløft.

• Styrkeløft
• Styrkeløft – norske verdensmestere
• Styrkeløft – kongepokalvinnarar

• Kjell Egil Bakkelund sin utøvarprofil på styrkeloft.no
• Ringsaker Blad: Sprikende forklaringer