Audun Heskestad

Audun Heskestad var ein norsk forleggjar og målmann, som var forlagssjef i Det Norske Samlaget frå 1980 til 2004 og formann i Den norske Forleggerforening frå 1990 til 1993.

Heskestad er utdanna jurist, og var økonomisjef i Det Norske Samlaget frå 1971 til han vart forlagssjef same stad. Han fullførte den moderniseringa av Samlaget som Johs. Aanderaa hadde starta i 1958 og som Andreas Skartveit førte vidare frå 1973 til 1978.

Han vart kjend som ein profilert og respektert forleggjar, og markerte seg mellom anna med si evne til å finne gode kompromiss og med den målretta lobbyverksemda si overfor Stortinget og departement.

I 2011 vart han utnemnd til riddar av 1. klasse av St. Olavs orden for innsatsen sin for nynorsk skriftkultur.