Diskriminant er eit matematisk uttrykk som heng saman med løysing av andregradslikningar.
Andregradslikninga \( x^2+px+q=0\) har løysingane (røtene) \(x_1 = \frac{-p+\sqrt{p^2-4q}}{2}\) og \(x_2 = \frac{-p-\sqrt{p^2-4q}}{2}\). Diskriminanten D er uttrykket p2 − 4q som står under rotteiknet.
Når \(p\) og \(q\) er reelle tal, kan tre hovudtilfelle inntreffe:
- \(D > 0 \) inneber at likninga har to forskjellige reelle røter.
- \(D = 0 \) inneber at likninga har éi reell rot (ei dobbeltrot).
- \( D < 0\) betyr at likninga har ingen reelle, men to komplekse røter.
Diskriminantomgrepet for andregradspolynom kan generaliserast til generelle polynom av n-te grad. Då er det definert som produktet av kvadrata av differensane mellom to og to av røtene, men slik at berre eitt av dei to uttrykka \( (x_i-x_j)^2\) og \( (x_j-x_i)^2\) kjem med som faktorar i dette produktet. Døme: Er eit av uttrykka \( (x_2-x_3)^2\), kan ikkje noko anna uttrykk vere \( (x_3-x_2)^2 \).
Nemninga diskriminant kjem frå den britiske matematikaren James Joseph Sylvester.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.