Qiqihar

Qiqihar er ein by i Kina, i provinsen Heilongjiang, i den fruktbare Nenjiang-dalen, 280 kilometer nordvest for Harbin.

Byen har 5 673 498 innbyggjarar (2011), og er eit jernbaneknutepunkt og viktig industrisenter. Den har omfattande mekanisk industri (maskinar, jernbaneutstyr, maskinverktøy, motorar, kranar), ein stor papirfabrikk (bygd i 1954), tømmerindustri og næringsmiddelindustri.

Qiqihar er ein av Nordaust-Kinas eldste byar, grunnlagt i 1699 som militært festningsanlegg. Området blei på 1700-tallet kolonisert av kinesarar, og var på 1800-tallet ein berykta grenseby i området mellom kinesisk og russisk innverknad. Industrien blei utbygd etter anlegg av den austmandsjuriske jernbanen i 1903 og nord–sør-banen i 1926. Under vern av den japanske okkupasjonsmakta (1931–1945) etablerte mange japanarar seg i byen.