Lin Biao var ein kinesisk offiser og politikar. Han var ein av den raude armés fremste kommandantar i 1930-åra og sjef for det raude militærakademi i Yan'an i 1936. Under borgarkrigen mellom nasjonalistar (Guomindang) og kommunistar (som Lin tilhøyrde) vann han store slag, og tilførte nasjonalistane avgjerande nederlag. Kommunistane danna Folkerepublikken Kina i 1949.
Lin blei marskalk i 1955, medlem av politbyråets faste utval i 1958 og forsvarsminister i 1959. Han leia ei forsert politisering av hæren som gav han stor innverknad på utforminga av landets politikk.
Ved utbrotet av kulturrevolusjonen i 1966 tredde Lin fram som Mao Zedongs næraste medarbeidar. Lin gav signalet til danninga av raude gardar og redigerte utvalet av Mao-sitat i Den lille raude bok. På partikongressen i 1969 blei han formelt utnemnd til Maos etterfølgjar i tilfelle Mao skulle døy.
Lin Biao omkom ved flystyrt i Mongolia i 1971, truleg under flukt på veg til Sovjetunionen, etter å ha teke del i eit komplott med sikte på å drepe Mao. Ein veit framleis svært lite om Lin Biaos død. I tida rett før flystyrten hadde han mista ein del av makta si, og truleg var flukta endepunktet for eit mislukka kuppforsøk. Forskarar er usamde om i kva grad Lin Biao sjølv la opp kupp-planane, eller om han var offer for støttespelarane sine.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.