sosiale ferdigheiter

Empati er evna til å leve seg inn i andre sin situasjon. Sosial sensitivitet og evne til å ta andre sitt perspektiv er sentralt. Det handlar om å sjå situasjonen frå den andre si side, vise omtanke for andre sine kjensler og synspunkt. Empati er viktig for å kunne etablerer nære relasjonar og kan vere ei motvekt mot mobbing og vald. Empati er både ein stabil eigenskap og situasjonsbestemt. Difor kan empati utviklast og endrast.

Samarbeid omfattar mellom anna å kunne nytte tida fornuftig medan ein ventar på tur, dele med andre, hjelpe andre, fylgje reglar og beskjedar, i tillegg til å kunne skifte aktivitet utan å protestere. Det omfattar å samarbeide med jamaldringar og med vaksne. Ein øver på samarbeid i reelle samarbeidssituasjonar og når samarbeid aktivt vert verdsett.

Kommunikasjon omhandlar verbal og non-verbal interaksjon med andre som å kunne ta tur i samtale med andre, halde augekontakt med den ein kommuniserer med og å vere høfleg.

Sjølvhevding er å kunne be om hjelp og informasjon, å presentere seg og å reagere, positivt eller negativt, på andre sine handlingar. Vidare handlar det om å kunne markere seg sosialt, mellom anna ved å uttykkje eigne meiningar og standpunkt, og kunne seie nei til det ein helst ikkje bør vere med på. Evna til tenleg sjølvhevding er ofte avgjerande for å kunne delta aktivt i sosiale fellesskap. Det handlar om å uttrykkje uavhengigheit og autonomi, i tillegg til å ta sosial kontakt og initiativ.

Engasjement handlar om å kunne invitere andre til å deltak i aktivitetar og generelt samhandle positivt med jamaldringar på ein måte som fremmar vidare samhandling.

Sjølvkontroll regulerer forholdet mellom åtferd og kjensler og nokon omtalar dette området som impulskontroll. Det handlar om evna til å tilpasse seg fellesskapet og ta omsyn til andre. Når ein opplever frustrasjon og motgang, eller når det oppstår usemje eller konfliktar, kjem evna til sjølvkontroll tydeleg fram i måten ein reagerer på erting og kommentarar på, utan å verte sint og ta igjen. Ein må kunne utsette behov, til dømes vente på tur, og kunne vise glede og sinne på måtar som passar i den aktuelle situasjonen.

Ansvar handlar om å vise respekt for eigne og andre sine eigedelar og arbeid, i tillegg til å kunne utføre oppgåver. Ein utviklar ansvar gjennom delta i avgjersler og å måtte ta konsekvensar av dei val ein gjer. Ein føresetnad for ansvar er difor tillit. Ansvar handlar om å kommunisere med vaksne. Det er viktig å merke seg at i ein barnehage der barn og unge er omgitt av reglar og kontroll over alt, har dei få muligheiter for å utvikle ansvar.